Read Revised Akuapem Twi DC-KYERƐW KRONKRON Eksodɔs 13 Bible Online

Eksodɔs 13 - Revised Akuapem Twi DC-KYERƐW KRONKRON bible

Eksodɔs 13

¹Na AWURADE ka kyerɛɛ Mose sɛ:

² Yɛ mmakan nyinaa, Israelfo mu ade biara a ebue yafunu ano wɔ nnipa ne afieboa mu, kronkron ma me, na me dea.

³Na Mose ka kyerɛɛ ɔman no sɛ: Monkae da yi a mode fii Misraim fii nkoafi mu no, efisɛ nsa a ɛyɛ den na Awurade de yii mo fii hɔ, na munnni mmɔkaw abodoo.

⁴ Ɛnnɛ da yi, ɔsram Abib a ɛte sɛ Oforisuo so na morefi Misraim.

⁵ Na sɛ AWURADE de wo nya du Kanaanfo ne Hetifo ne Amorifo ne Hewifo ne Yebusifo asase a ɔkaa w'agyanom ntam sɛ ɔde bɛma wo, asase a nufusu ne wo sen so no so a, ɛno de, fa ɔsom yi som no ɔsram yi so.

⁶ Nnansɔn na di apiti, na da a ɛto so ason no, hyɛ fa ma AWURADE.

⁷ Wonni apiti nnansɔn no, na mma wonnhu wo nkyɛn mmɔkaw abodoo anaa mmɔkaw w'asase so baabiara.

⁸Na da no bɔ din kyerɛ wo ba sɛ: Nea AWURADE yɛɛ me bere a mifii Misraim no ntia.

⁹ Na ɛnyɛ wo wo nsa so sɛnkyerɛnne ne w'aniwa ntam nkae ade, na AWURADE mmara no atena w'anom, efisɛ nsa a ɛyɛ den na AWURADE de yii wo fii Misraim.

¹⁰Enti di atɔremude yi so wɔ ne bere mu afe daa.

¹¹Na sɛ AWURADE de wo du Kanaanfo asase so, sɛ ɔkaa wo ne w'agyanom ntam, na ɔde ma wo a,

¹²yi ade biara a ebue yafunu ano ma AWURADE, na w'afieboa a wowɔ no mma nyinaa a wobue yafunu ano a wɔyɛ anini, fa ma AWURADE.

¹³Na mfurum mmakan nyinaa de, fa oguan sesa, na sɛ woansesa a, bu ne kɔn mu. Na nnipa mmakan a wɔwɔ wo mmammarima mu nyinaa de, sesa gye wɔn.

¹⁴ Na sɛ ɔkyena bi wo ba bisa wo sɛ: Eyi ase ne dɛn, a, ka kyerɛ no sɛ: Nsa a ɛyɛ den na AWURADE de yii yɛn Misraim fii nkoasom mu.

¹⁵ Na Farao pirim ne koma na ɔmpene sɛ ɔbɛma yɛakɔ no, AWURADE kum Misraim asase so mmakan nyinaa, efi nnipa mmakan so kosi afieboa mmakan so. Ɛno nti na me nso mede anini a ebue yafunu ano no nyinaa mebɔ AWURADE afɔre, nanso me mma mu mmakan nyinaa de, mesesa gye wɔn.

¹⁶Na ɛnyɛ wo nsa so sɛnkyerɛnne ne w'aniwa ntam nkae ntamabamma, sɛ nsa a ɛyɛ den na AWURADE de yii yɛn fii Misraim.

¹⁷Na Farao maa ɔman no kwan no, Onyankopɔn amfa wɔn ankɔfa Filistifo asase so kwan a ɛnware no, efisɛ Onyankopɔn se: Na ɔman no ankohyia ɔsa annu wɔn ho, na wɔansan ankɔ Misraim.

¹⁸Enti Onyankopɔn de ɔman no kɔntɔn faa sare so kwan a ɛda mmɛw po ho no so. Na Israelfo no kɔɔ amia mu fii Misraim asase so kɔe.

¹⁹ Na Mose faa Yosef nnompe no, efisɛ Yosef aka Israelfo ntam sɛ: Ɔhwɛ na Onyankopɔn bɛba abɛhwɛ mo, na momfa me nnompe mfi ha nkɔ.

²⁰Na wosiim fii Sukot kɔbɔɔ nsra wɔ Etam, wɔ sare no ano.

²¹ Na AWURADE dii wɔn anim, awia, omununkum dum mu, sɛ ɔrekyerɛ wɔn kwan, na anadwo, ogya dum mu, sɛ ɔrema wɔn hann, na wɔanantew awia ne anadwo.

²²Na omununkum dum no antwe ne ho awia, na ogya dum no antwe ne ho anadwo amfi ɔman no anim.