Read Revised Akuapem Twi DC-KYERƐW KRONKRON Eksodɔs 27 Bible Online

Eksodɔs 27 - Revised Akuapem Twi DC-KYERƐW KRONKRON bible

Eksodɔs 27

¹ Na fa ɔkanto yɛ afɔremuka no: ne tenten basafa abien ne fa ne tɛtrɛtɛ basafa abien ne fa; afɔremuka no nyɛ ahinanan, na ne sorokɔ nso nyɛ basafa biako ne fa.

²Na yɛ ne mmɛn sisi ne twɔtwɔw anan so; emu ara na ne mmɛn no mfi, na fa kɔbere dura ho.

³Na yɛ ɛho nseaa a wɔde ne nso begu mu, ne ne sesaw ade ne ne nkora ne n'adinam ne ne nsramma kukuwa, ɛho nneɛma nyinaa, kɔbere na fa yɛ.

⁴Na fa kɔbere nwene ntontan wɔ ho, sɛnea wɔnwene ɔtan, na yɛ ɔtan no so kɔbere nkaa anan wɔ ne twea anan no so.

⁵Na fa si afɔremuka no bamma ho wɔ ase, na ɔtan no nnu afɔremuka no mfinimfini.

⁶Na sinsen afɔremuka no ho mpoma, ɔkanto mpoma, na fa kɔbere duradura ho.

⁷Na wɔmfa mpoma no nwurawura nkaa no mu, na mpoma no nhyehyɛ afɔremuka no nkyɛn nkyɛn, na wɔde asoa.

⁸ Fa ntaaboo yɛ, na emu nna ɔkwan. Sɛnea wɔakyerɛ wo bepɔw no so no, saa ara na wɔnyɛ no.

⁹ Na yɛ tenabea no adiwo! Na adiwo mmɔhɔɔ a wɔde asaawa fitaa a wɔafira anwene a ne tenten si basafa aduonum nni hɔ wɔ ɔfa biako wɔ nifa fam a ɛkyerɛ nifa,

¹⁰ne n'adum aduonu ne ne nnyinaso aduonu a wɔde kɔbere ayɛ; na adum no nkoropɛe ne ne mmeae nyɛ dwetɛ.

¹¹Saa ara nso na benkum fam tenten mu no, mmɔhɔɔ a ne tenten basafa aduonum ne n'adum aduonu ne ne kɔbere nnyinaso aduonu nni; na adum no nkoropɛe ne ne mmeae no nyɛ dwetɛ.

¹²Na adiwo no tɛtrɛtɛ a ɛkyerɛ atɔe fam no, mmɔhɔɔ basafa aduonum anum nni hɔ; n'adum du ne ne nnyinaso du.

¹³Na adiwo no tɛtrɛtɛ a edi anim fam a ɛkyerɛ apuei nyɛ basafa aduonum anum:

¹⁴nkyɛn ha mmɔhɔɔ no nyɛ basafa ason ne fa, n'adum abiɛsa ne ne nnyinaso abiɛsa;

¹⁵na nkyɛn ha nso mmɔhɔɔ no nyɛ basafa ason ne fa, n'adum abiɛsa ne ne nnyinaso abiɛsa.

¹⁶Na adiwo no ano pon no nkataano nyɛ basafa du; wɔmfa bibiri ne asaawa a ɛbere dum ne adidi ne asaawa fitaa a wɔafira a ɛyɛ nkyeremu; n'adum anan ne ne nnyinaso anan.

¹⁷Adum no a etwa adiwo no ho hyia nyinaa mmeae a ɛbeabea ho nyɛ dwetɛ, ne nkɔtɔkorɔ nso nyɛ dwetɛ, na ne nnyinaso nyɛ kɔbere.

¹⁸Adiwo no tenten nyɛ basafa aduonum, na ne tɛtrɛtɛ nso nyɛ basafa aduonum anum, na ne korɔn nso basafa abien ne fa; mmɔhɔɔ no nyɛ nwera a wɔafira n'asaawa, na ne nnyinaso nyɛ kɔbere.

¹⁹Tenabea no ho som nyinaa mu adwinni nyinaa ne ne mmofunnua nyinaa ne adiwo no ho mmofunnua nyinaa nyɛ kɔbere.

²⁰ Na wo nso hyɛ Israelfo no na wɔmmrɛ wo ngodua aba a wɔasiw ngo gyenennyenen, na wɔmfa nsɔ kanea no, na akanea no nsisi so daa yi;

²¹na Aaron ne ne mma nhwɛ so, ahyiae ntamadan no mu, ntwamu mmɔhɔɔ a ɛkata Adanse no anim no anim, mfi anwummere nkosi anɔpa wɔ AWURADE anim. Ɛnyɛ daa ahyɛde a Israelfo nni so, wɔn awo ntoatoaso nyinaa mu.