Read Revised Akuapem Twi DC-KYERƐW KRONKRON Eksodɔs 32 Bible Online

Eksodɔs 32 - Revised Akuapem Twi DC-KYERƐW KRONKRON bible

Eksodɔs 32

¹ Na ɔman no hui sɛ Mose akyɛ na onsian mfi bepɔw no so mma no, ɔman no boaa wɔn ho ano baa Aaron nkyɛn besee no sɛ: Sɔre yɛ anyame ma yɛn, na wonni yɛn anim, efisɛ Mose yi, ɔbarima a okoyii yɛn fii Misraim bae no de, yennim nea ayɛ no.

²Ɛnna Aaron ka kyerɛɛ wɔn sɛ: Munyiyi sika nkaa a ɛwowɔ mo yerenom ne mo mmabanin ne mo mmabea asom mfa mmrɛ me.

³Na ɔman no nyinaa yiyii sika nkaa a ɛwowɔ wɔn asom no de brɛɛ Aaron.

⁴ Na ogyei wɔ wɔn nsam, na ɔde pɛe yeyɛe, na ɔyɛɛ no nantwi a wɔagu; na wɔkae sɛ: Israel, eyinom ne wo anyame a woyii wo fii Misraim asase so bae no.

⁵Na Aaron hui no, osii afɔremuka wɔ n'anim; na Aaron paee sɛ: Ɔkyena ne AWURADE afahyɛ.

⁶ Na wotuaa ahema bobɔɔ ɔhyew afɔre ne asomdwoe afɔre; na ɔman no tenaa ase didi nomee, na wɔsɔre gorui.

⁷Na AWURADE ka kyerɛɛ Mose sɛ: Sian kɔ, na wo man a wode wɔn fi Misraim asase so bae no redi asɛmmɔne;

⁸ wɔaman afi ɔkwan a mekyerɛɛ wɔn no so ntɛm; wɔayɛ nantwi ba a wɔagu, na wɔasɔre no abɔ afɔre ama no aka sɛ: Israel, eyinom ne wo anyame a woyii wo fii Misraim asase so bae no.

⁹Na AWURADE ka kyerɛɛ Mose sɛ:

¹⁰ Mahu ɔman yi, na hwɛ, wɔyɛ ɔman a wɔn kɔn asen; na afei ma me kwan na me bo nhuru nhyɛ wɔn, na memmene wɔn, na memfa wo menyɛ ɔman kɛse.

¹¹Na Mose paa AWURADE ne Nyankopɔn kyɛw sɛ: AWURADE, ɛdɛn nti na wo bo huru hyɛ ɔman a wode ahoɔden kɛse ne nsa a ɛyɛ den koyii wɔn Misraim asase so bae no?

¹²Ɛdɛn nti na Misraimfo nka sɛ: Adwemmɔne bi nti na obeyii wɔn kɔe sɛ okokum wɔn mmepɔw so na wapra wɔn afi asase ani? San fi w'abufuhyew no mu, na ma bɔne a worebɛyɛ wo man no nyɛ wo yaw.

¹³ Kae Abraham, Isak ne Israel, wo nkoa a wokaa wɔn wo ankasa wo ntam ka kyerɛɛ wɔn sɛ: Mɛma w'asefo adɔɔso sɛ ɔsoro nsoromma, na asase a maka ho asɛm yi nyinaa, mede mɛma w'asefo na wɔadi so akosi daa, no.

¹⁴Na AWURADE nuu ne ho wɔ bɔne a ɔkae sɛ ɔrebɛyɛ ne man no ho.

¹⁵Na Mose dan ne ho sian fii bepɔw no so, na adanse apon abien no kura ne nsam, abopon a wɔakyerɛw n'afanu, wɔakyerɛw so ɛha ne ha.

¹⁶ Na apon no yɛ Onyankopɔn adwuma, na kyerɛw no yɛ Onyankopɔn kyerɛw a wɔakurukyerɛw apon no so.

¹⁷Na Yosua tee sɛ ɔman no rebɔ ose na wɔreyɛ gyegyeegye no, ɔka kyerɛɛ Mose sɛ: Ɔko gyegyeegye wɔ nsra no mu.

¹⁸Na ose: Ɛnyɛ nkonimdi ho sebɔ gyegyeegye na ɛnyɛ nkogu ho nteɛm gyegyeegye, na mmom dwomsogye gyegyeegye na mete yi.

¹⁹Na Mose bɛn nsra no na ohuu nantwi ba ne asaw no ara pɛ, ne bo fuwii, na ɔtow apon a ɛwɔ ne nsam no gui ma ɛbobɔe bepɔw no ase.

²⁰Na ɔfaa nantwi ba a wɔyɛe no de gya hyewee, na ɔyam no muhumuhu de petee nsu ani maa Israelfo no nomee.

²¹Na Mose ka kyerɛɛ Aaron sɛ: Dɛn na ɔman yi yɛɛ wo na wode bɔne kɛse aba wɔn so yi?

²²Ɛnna Aaron se: Mma me wura bo mmfuw, wo ara wunim ɔman yi sɛ bɔne ara na wɔde asi wɔn anim.

²³Na wɔka kyerɛɛ me sɛ: Yɛ anyame ma yɛn na wonni yɛn anim, efisɛ Mose yi, ɔbarima a okoyii yɛn fii Misraim asase so bae no, yennim nea ayɛ no.

²⁴Na misee wɔn sɛ: Wɔn a wɔwɔ sika bi no, wonyi. Na wɔde maa me, na metow guu gya mu, na nantwi ba yi fii mu bae.

²⁵Na Mose hui sɛ ɔman no agye nsam (Aaron na ama ɔman no nneyɛe agye nsam ama wɔabɔ adapaa, wɔn atamfo anim no),

²⁶ogyinaa nsraban no tia kae sɛ: Nea ɔwɔ AWURADE afa mmra me nkyɛn. Na Lewifo nyinaa boaboaa wɔn ho ano baa ne nkyɛn.

²⁷Na ɔka kyerɛɛ wɔn sɛ: AWURADE, Israel Nyankopɔn se: Momfa mo nkrante mmobɔ mo asen, na muntwa mu nkɔ, na monsan mmra, mfi nsra no tia nkɔ tia, na munkunkum mo nuanom ne mo nnamfonom ne mo afipamfo.

²⁸Na Lewifo no yɛe sɛnea Mose ka kyerɛɛ wɔn no, na ɛda no ɔman no mu nnipa bɛyɛ mpensa totɔe.

²⁹ Na Mose kae sɛ: Monyɛ mo ho kronkron mma AWURADE nnɛ, sɛ obiara bɛsɔre ahyɛ ne ba ne ne nua po, na mode nhyira aba mo so nnɛ.

³⁰Na ade kyee no, Mose ka kyerɛɛ ɔman no sɛ: Mo de, moayɛ bɔne kɛse, na afei mɛforo makɔ AWURADE nkyɛn, ebia metumi mapata ama mo bɔne no.

³¹Na Mose san kɔɔ AWURADE nkyɛn kɔkae sɛ: Ao, bɔne kɛse na ɔman yi ayɛ, na wɔayɛ sika anyame afa.

³² Na afei, sɛ wode wɔn bɔne no bekyɛ a! Na sɛ ɛnte saa a, popa me nso fi wo nhoma a woakyerɛw no mu ɛ!

³³Na AWURADE ka kyerɛɛ Mose sɛ: Nea wayɛ me bɔne no, ɔno na mɛpopa no mafi me nhoma mu.

³⁴ Na afei kɔ, na kogya ɔman no kɔ nea maka makyerɛ wo no; hwɛ, me bɔfo bedi w'anim; nanso da a mɛba mabɛhwɛ wɔn no, metua wɔn wɔn bɔne so ka.

³⁵Na sɛ wɔayɛ nantwi ba a Aaron yɛe no nti, AWURADE haw ɔman no.