Read Revised Akuapem Twi DC-KYERƐW KRONKRON Eksodɔs 36 Bible Online

Eksodɔs 36 - Revised Akuapem Twi DC-KYERƐW KRONKRON bible

Eksodɔs 36

¹Na Besalel ne Oholiab ne wɔn a wɔwɔ nyansa koma a Awurade de nyansa ne nhumu ahyɛ wɔn mu sɛ wonhu ade no yɛ nyinaa na wɔbɛyɛ kronkronbea ɔsom no ho adwuma, sɛnea Awurade ahyɛ no nyinaa.

²Na Mose frɛɛ Besalel ne Oholiab ne komam anyansafo a Awurade de nyansa ahyɛ wɔn koma mu nyinaa, wɔn a wɔn koma kanyan wɔn sɛ wɔmmra adwuma no ho mmɛyɛ nyinaa.

³Na wogyee soma afɔrebɔde a Israelfo de bae sɛ wɔmfa nyɛ kronkronbea som ho adwuma no nyinaa Mose anim sɛ wɔde bɛyɛ. Na wɔkɔɔ so ara de ayamye ayɛyɛde brɛɛ no daa anɔpa.

⁴Na adwumfo a wɔyɛ kronkronbea no ho adwuma nyinaa fi wɔn nnwuma a wɔreyɛ no ho bae

⁵bɛka kyerɛɛ Mose sɛ: Ɔman no ama nea wɔde ba adɔɔso sen nea ɛbɛso adwuma a Awurade hyɛe sɛ wɔnyɛ no.

⁶Na Mose hyɛ ma wɔpaee nsra no mu sɛ: Ɔbarima oo, ɔbea oo, obiara mmfa biribi mmmɛyɛ kronkronbea no ho soma afɔrebɔde bio.

⁷Ɛnna ɔman no de gyaee ba. Efisɛ nea wɔanya no dɔɔso ma adwuma no nyinaa sɛ wɔde bɛyɛ ama ebi aka.

⁸ Na wɔn a wɔyɛ adwuma no mu komam anyansafo nyinaa yɛɛ tenabea no; wɔde asaawa fitaa a wɔafira ne bibiri ne asaawa a ɛbere dum ne adidi yɛɛ ntama du, kerubim a ɛyɛ ntamanwene mu adwinni na wɔde yɛe.

⁹Ntama biara tenten si basafa dunan, na ntama biara tɛtrɛtɛ si basafa abien; ntama no nyinaa nsusuwii yɛ biako.

¹⁰Na ɔde ntama no anum toatoaa so ma biako toaa biako so, na ɔde ntama no anum nso toatoaa so ma biako toaa biako so.

¹¹Na ɔde bibiri bobɔɔ ntama biako mmuano so nhentia wɔ ano wɔ ntoae no so, saa ara nso na ɔyɛe, ntama a edi akyiri no mmuano so wɔ ntoae a ɛto so abien no so;

¹²nhentia aduonum na ɔbobɔe ntama biako ano, na nhentia aduonum nso na ɔbobɔe, ntama a ɛwɔ ntoae a ɛto so abien no so no ano; nhentia no dii mmɔanim.

¹³Na ɔyɛɛ sika nkɔtɔkorɔ aduonum, na ɔde nkɔtɔkorɔ no toatoaa ntama no, na tenabea no yɛɛ biako.

¹⁴Na ɔyɛɛ mmirekyi nwi ntama de yɛɛ ntamadan wɔ tenabea no so; ntama dubiako na ɔyɛe.

¹⁵Ntama biako tenten si basafa dunum, na ntama biako tɛtrɛtɛ yɛ basafa abien; ntama dubiako no nsusuwii yɛ pɛ.

¹⁶Na ɔde ntama no anum toatoae yɛɛ no biako, na ɔde asia nso toatoae yɛɛ no biako.

¹⁷Na ɔbobɔɔ nhentia aduonum, ntama a edi akyiri no mmuano so, wɔ ntoae no so, na ɔbobɔɔ nhentia aduonum nso, ntoae a ɛto so abien no ntama no mmuano so.

¹⁸Na ɔyɛɛ kɔbere nkɔtɔkorɔ aduonum de toatoaa ntamadan no, na ayɛ biako.

¹⁹Na ɔde adwennini nhoma a wɔahyɛ no kɔkɔɔ yɛɛ ntamadan no nkataso, na ɔde sukraman nhoma yɛɛ ɛno so nkataso.

²⁰ Na ɔde ɔkanto yɛɛ tenabea no ntaaboo a esisi hɔ.

²¹Taaboo biako tenten yɛ basafa anum, na taaboo biako tɛtrɛtɛ yɛ anammɔn abien ne fa.

²²Nan abien tuatua taaboo biako ase, na biribi suso nan biako ne biako no mu: saa na ɔyɛe tenabea ntaaboo no nyinaa ho.

²³Na ɔyɛɛ tenabea ntaaboo no: ntaaboo aduonu di nifa fam a ɛkyerɛ nifa.

²⁴Na ɔyɛɛ ntaaboo aduonu no ase dwetɛ nnyinaso aduanan; nnyinaso abien hyɛ ntaaboo no biara ase ma ne nan abien no.

²⁵Na tenabea no nkyɛn biako a edi benkum fam no, ɔde ntaaboo aduonu kosisii hɔ,

²⁶ne ne dwetɛ nnyinaso aduanan, taaboo biara ase nnyinaso abien.

²⁷Na tenabea no akyi fam a ɛkyerɛ atɔe no, ɔde ntaaboo asia kosisii hɔ.

²⁸Na ɔde ntaaboo abien kosisii tenabea no akyi ntwea no so,

²⁹na ɛpam ho fi fam de rekɔ, nanso ɛyɛ mu kodu ne hin so, nea kaa a edi kan no tua hɔ. Saa na ɔyɛɛ n'abien nyinaa ntwea abien no so.

³⁰Na ntaaboo awotwe ne ne dwetɛ nnyinaso dunsia na ɛwɔ hɔ, taaboo biara ase nnyinaso abien.

³¹ Na ɔde ɔkanto yɛɛ mmeamu, tenabea no nkyɛn biako ntaaboo no de anum,

³²ne tenabea no nkyɛn biako no nso ntaaboo no mmeamu anum, ne tenabea no akyi, atɔe fam ntaaboo no de, mmeamu anum.

³³Na ɔde mfinimfini mmeamu no beaa ntaaboo no mfinimfini de twaa mu fi ti koduu ti.

³⁴Na ɔde sika duraduraa ntaaboo no ho, na ɔde sika yɛɛ ɛho nkaa no sɛ ɛnyɛ mmeamu no hyehyɛbea, na ɔde sika duraduraa mmeamu no ho.

³⁵ Na ɔde bibiri ne asaawa a ɛbere dum ne adidi ne asaawa fitaa a wɔafira yɛɛ mmɔhɔɔ; ɔyɛɛ no ntamanwene mu adwinni a kerubim wɔ mu.

³⁶Na ɔyɛɛ ho ɔkanto adum anan, na ɔde sika duraduraa ho; ne nkoropɛe yɛ sika; na ɔde dwetɛ nnyinaso anan guu ase.

³⁷Na ɔde bibiri ne asaawa a ɛbere dum ne adidi ne asaawa fitaa a wɔafira nwenee nkyeremu de yɛɛ ntamadan no ano nkataano.

³⁸Na ɔyɛɛ ɛho adum anum ne nkoropɛe, na ɔde sika duraduraa n'atifi ne ne mmeae ho, na ne nnyinaso anum yɛ kɔbere.