Read Revised Akuapem Twi DC-KYERƐW KRONKRON Eksodɔs 38 Bible Online

Eksodɔs 38 - Revised Akuapem Twi DC-KYERƐW KRONKRON bible

Eksodɔs 38

¹ Na ɔde ɔkanto yɛɛ ɔhyew afɔremuka no, ne tenten basafa abien ne fa ne ne tɛtrɛtɛ basafa abien ne fa, ɛyɛ ahinanan, na ne sorokɔ yɛ basafa biako ne fa.

²Na ɔyɛɛ ne mmɛn, ne twɔtwɔw anan no so, emu ara na ne mmɛn no tuatua, na ɔde kɔbere duraa ho.

³Na ɔyɛɛ afɔremuka no ho nneɛma nyinaa, nseaa ne sesaw ade ne nkora, adinam ne nsramma kukuwa no; ɛho nneɛma nyinaa, ɔde kɔbere na ɛyɛe.

⁴Na ɔnwenee afɔremuka no ho kɔbere ntontan a wɔanwene no sɛ ɔtan, ne bamma no ase fi fam kodu mfinimfini.

⁵Na oguu nkaa anan tuatuaa kɔbere ntontan no ntwea anan no so, sɛ ɛnyɛ mpoma no hyehyɛbea.

⁶Na ɔde ɔkanto sinsen mpoma, na ɔde kɔbere duraduraa ho.

⁷Na ɔde mpoma no wurawuraa nkaa no mu afɔremuka no nkyɛn nkyɛn, na wɔde asoa. Ɔde ntaaboo na ɛyɛe, na emu da ɔkwan.

⁸ Na ɔde kɔbere yɛɛ asankasɔn no, na ne ntaase nso yɛ kɔbere a onya fii mmea a wɔba bɛsom, ahyiae ntamadan no ano, no kɔbere nhwehwɛ mu.

⁹ Na ɔyɛɛ adiwo no: nifa fam a ɛkyerɛ nifa adiwo mmɔhɔɔ a wɔde asaawa fitaa a wɔafira anwene, basafa aduonum,

¹⁰ne n'adum aduonu ne ne kɔbere nnyinaso aduonu, adum no nkoropɛe ne ne mmeae yɛ dwetɛ;

¹¹ne benkum fam mmɔhɔɔ no, basafa aduonum, n'adum aduonu ne ne kɔbere nnyinaso aduonu, adum no nkoropɛe ne ne mmeae yɛ dwetɛ;

¹²ne atɔe fam mmɔhɔɔ no basafa aduonum anum, n'adum du ne ne nnyinaso du, adum no nkɔtɔkorɔ ne ne mmeae yɛ dwetɛ;

¹³ne anim fam a ɛkyerɛ apuei de, basafa aduonum anum:

¹⁴ɔfa ha mmɔhɔɔ basafa ason ne fa, n'adum abiɛsa ne ne nnyinaso abiɛsa;

¹⁵ne ɔfa biako no de nso adiwo no abobow ano ɔfa ha ne ha mmɔhɔɔ basafa ason ne fa, n'adum abiɛsa ne ne nnyinaso abiɛsa.

¹⁶Adiwo no mmɔhɔɔ a etwa ho hyia nyinaa, asaawa fitaa a wɔafira na wɔde yɛe,

¹⁷na adum no yɛ kɔbere, adum no nkoropɛe ne ne mmeae yɛ dwetɛ, ne ti nnuraho yɛ dwetɛ; adiwo no adum nyinaa dwetɛ mmeae na ɛbeabea ho;

¹⁸na adiwo no abobow ano nkataano no yɛ adenwene adwuma a wɔde bibiri ne asaawa a ɛbere dum ne adidi ne asaawa fitaa a wɔafira ayɛ, na ne tenten si basafa du, na ne sorokɔ wɔ ne trɛw mu si basafa abien ne fa, te sɛ adiwo no ho mmɔhɔɔ no;

¹⁹na n'adum anan ne ne kɔbere nnyinaso anan, ne nkoropɛe yɛ dwetɛ, na ne ti nnuraho ne ne mmeae nso yɛ dwetɛ.

²⁰Na tenabea no ne adiwo no ho mmofunnua a etwa ho hyia no nyinaa yɛ kɔbere.

²¹ Eyi ne tenabea no, adanse tenabea no ho nneɛma anobu, sɛnea wɔnam Mose anom asɛm so maa ɔsɔfo Aaron ba Itamar buu ano maa Lewifo som no.

²² Na Hur ba Uri ba Besalel a ofi Yuda abusuakuw mu no yɛɛ nea AWURDE hyɛɛ Mose no nyinaa;

²³na nea ɔka ne ho ne Ahisamak ba Oholiab a ofi Dan abusuakuw mu a ɔyɛ sika ne dua dwumfo ne ɔnwemfo a ɔde bibiri ne asaawa a ɛbere dum ne adidi ne asaawa fitaa di ntama mu adwinni.

²⁴ Sika a wɔde yɛɛ adwuma no nyinaa, kronkronbea no ho nnwuma nyinaa, ɔtow sika no, ano si dwetikɛse aduonu akron ne nnwetɛbona ahansɔn aduasa, sɛnea kronkronbea dwetɛbona no te.

²⁵Na asafo no mu nnipa a wɔkan wɔn no dwetɛ ano si dwetikɛse ɔha ne nnwetɛbona apem ahansɔn aduɔsɔn anum, sɛnea kronkronbea dwetɛbona no te:

²⁶wɔn a wɔkan wɔn fraa dodow no mu a wɔadi mfirihyia aduonu anaa nea ɛboro saa a wosi mpem ahansia ne mpensa ne ahanum aduonum no mu biara yii beka biako a ɛyɛ dwetɛbona fa, sɛnea kronkronbea dwetɛbona no te.

²⁷Na wɔde dwetɛ dwetikɛse ha no guu kronkronbea no nnyinaso ne ntwamu mmɔhɔɔ no nnyinaso no, nnyinaso ha no yɛ dwetikɛse ha, dwetikɛse biako yɛ nnyinaso biako.

²⁸Na nnwetɛbona apem ahansɔn aduɔsɔn anum no, ɔde yɛɛ adum no nkoropɛe, na ɔde bi duraduraa ne ti ho, na ɔde bi beabeaa ho.

²⁹Na ɔtow kɔbere no ano si dwetikɛse aduɔsɔn ne nnwetɛbona mpennu ahannan.

³⁰Na ɛno na ɔde yɛɛ ahyiae ntamadan no ano nnyinaso, ne kɔbere afɔremuka ne ɛho kɔbere ntontan ne afɔremuka no ho nneɛma nyinaa,

³¹ne adiwo no nnyinaso a etwa ho hyia, ne adiwo no abobow ano nnyinaso, ne tenabea no ho mmofunnua nyinaa, ne adiwo no mmofunnua a etwa ho hyia nyinaa.