Read Revised Akuapem Twi DC-KYERƐW KRONKRON Eksodɔs 39 Bible Online

Eksodɔs 39 - Revised Akuapem Twi DC-KYERƐW KRONKRON bible

Eksodɔs 39

¹ Na bibiri ne asaawa a ɛbere dum ne adidi no, wɔde yɛɛ ɔsom ntade a wɔde bɛsom kronkronbea hɔ, na wɔyɛɛ Aaron ntade kronkron no, sɛnea AWURADE hyɛɛ Mose no.

²Na ɔde sika ne bibiri ne asaawa a ɛbere dum ne adidi ne asaawa fitaa a wɔafira nwenee asɔfotade no.

³Na wɔboroo sika tratraa twitwaa no nteanteaa sɛ wɔde rebɛsesa bibiri ne asaawa a ɛbere dum ne adidi ne asaawa fitaa no mu adi no adwinni.

⁴Wɔyɛɛ ɛho mmati a wɔde toa; na wɔkaa ano abien no toae.

⁵Na asɔfotade no nkyekyeremu a ɛwɔ so no, efi mu ara te sɛ n'adwinni no ara, sika ne bibiri ne asaawa a ɛbere dum ne adidi ne asaawa fitaa a wɔafira, sɛnea AWURADE hyɛɛ Mose no.

⁶Na wɔyɛɛ apopobibiri abo a esisi sika nnwinne mu a wɔakurukyerɛw so nsɔanode nkurukyerɛwee, sɛnea Israel mma din te.

⁷Na ɔde fam asɔfotade no mmati so sɛ ɛnyɛ Israelfo no nkae abo, sɛnea Awurade hyɛɛ Mose no.

⁸Na ɔde adwinni nwenee adɛbo no sɛ asɔfotade no adwinni no te, sika bibiri ne asaawa a ɛbere dum ne adidi ne asaawa fitaa a wɔafira;

⁹ɛyɛ ahinanan, wobukaw adɛbo no to so, ne tenten yɛ nsama na ne trɛw yɛ nsama, na wobukaw to so.

¹⁰Na wɔde abo kyerɛpɛn anan sisii mu; kyerɛpɛn a edi kan no yɛ bogyanam bo, akrate bo ne ahabammono bo;

¹¹na kyerɛpɛn a ɛto so abien yɛ nsrama bo, hoa bo ne bɔwerɛ bo;

¹²na kyerɛpɛn a ɛto so abiɛsa yɛ akutuhono bo, mfrafrae bo ne beredum bo;

¹³na kyerɛpɛn a ɛto so anan yɛ sikabereɛbo, apopobibiribo ne ahwehwɛbo; ne nsisimu no wɔyɛɛ ho sika nnwinne hyiae.

¹⁴Na abo no ano du Israel mma no din ano, dumien, sɛ wɔn din te; ɛyɛ nsɔanode nkurukyerɛwee, sɛnea din no te mmiako mmiako, sɛ mmusuakuw dumien no te.

¹⁵Na wɔde sika amapa yɛɛ adɛbo no so ntweaban a wɔawɔw no mmɛsa sɛ nhama.

¹⁶Na wɔyɛɛ sika nnwinne abien ne sika nkaa abien, na wɔde nkaa abien no hyehyɛɛ adɛbo no ntwea abien so.

¹⁷Na wɔde sika mmɛsa abien no toatoaa nkaa abien a ɛwowɔ adɛbo no ntwea so no mu.

¹⁸Na wɔde mmɛsa abien no ano abien a aka no toatoaa nnwinne abien no mu, na wɔde hyehyɛɛ asɔfotade no mmati abien no so, anim fam.

¹⁹Na wɔyɛɛ sika nkaa abien de hyehyɛɛ adɛbo no ntwea abien no so, wɔ ano a ɛwɔ emu fam kyerɛ asɔfotade no.

²⁰Na wɔyɛɛ sika nkaa abien bio de hyehyɛɛ asɔfotade no afaafa abien no so anim fam wɔ ase a ɛbɛn ne ntoae, nguguso no nkyekyeremu no so.

²¹Na wɔde bibiri nhama kyekyeree adɛbo nkaa no susoo nguguso no nkaa no mu sɛ ɛmfam asɔfotade no nkyekyeremu no atifi, na adɛbo no antwitwiw amfi asɔfotade no so, sɛnea AWURADE hyɛɛ Mose no.

²² Na ɔyɛɛ asɔfotade no ase batakari no, wɔde birisi na ɛnwenee ne nyinaa.

²³Na batakari no tokuru da ne mfinimfini te sɛ nkatabo mu tokuru, wɔde ntamabena ban tokuru no ano hyiae, na ansuane.

²⁴Na wɔde bibiri ne asaawa a ɛbere dum ne adidi a wɔafira yɛɛ ateaa aba wɔ batakari no mmuano so.

²⁵Na wɔyɛɛ sika amapa nnɔnnɔmma, na wɔde nnɔnnɔmma no sensɛn ateaa aba no ntam ntam, batakari no mmuano no so de twaa ho hyiae, ateaa aba no ntam ntam:

²⁶adɔmma ne ateaa aba, adɔmma ne ateaa aba didi so ara batakari no mmuano so hyia, na wɔde asom, sɛnea AWURADE hyɛɛ Mose no.

²⁷ Na wɔde nwera fɛfɛ a wɔanwene yɛɛ ntade yuu no maa Aaron ne ne mma,

²⁸ne nwera abotiten, ne nwera ahokeka abotiri, ne nwera twakoto a wɔde asaawa fitaa a wɔafira ayɛ,

²⁹ne adenwene abɔmu a wɔde asaawa fitaa a wɔafira ne bibiri ne asaawa a ɛbere dum ne adidi yɛe, sɛnea AWURADE hyɛɛ Mose no.

³⁰ Na wɔboroo sika amapa tratraa de yɛɛ abɔanim kronkron no, na wɔkyerɛw so nkyerɛwee sɛ nsɔanode so nkurukyerɛwee sɛ: Kronkron ma AWURADE.

³¹Na wɔde bibiri hama kyekyere fam abotiten no so, sɛnea AWURADE hyɛɛ Mose no.

³²Na wɔyɛɛ ahyiae ntamadan no ho adwuma nyinaa wiei, na Israelfo yɛe sɛnea AWURADE hyɛɛ Mose no nyinaa; saa ara na wɔyɛe.

³³Na wɔde tenabea no brɛɛ Mose: ntamadan no ne ɛho nneɛma nyinaa, ne nkɔtɔkoro, ne nsisiho ntaaboo, ne mmeamu ne ne nsisimu adum ne ne nnyinaso;

³⁴ne adwennini nhoma a wɔahyɛ no kɔkɔɔ nkataso ne sukraman nhoma nkataso, ne ntwamu mmɔhɔɔ no;

³⁵adanse adaka ne ne mpoma ne mpata agua no;

³⁶ɔpon no ne ɛho nneɛma nyinaa ne kyerɛ abodoo no;

³⁷kaneadua kronkron no, n'akanea a wɔasiesie sisi so ne ɛho nneɛma nyinaa ne kanea no ngo;

³⁸ne sika afɔremuka ne ɔsra ngo ne ɔhyew aduhuam ne ntamadan no ano nkataano no;

³⁹kɔbere afɔremuka no ne ɛho kɔbere ntontan no, ne mpoma ne ɛho nneɛma nyinaa; asankasɔn no ne ne ntaase;

⁴⁰adiwo no mmɔhɔɔ, n'adum ne ne nnyinaso ne adiwo no abobow ano nkataano, ne ntampehama ne ne mmofunnua, ne ahyiae ntamadan no tenabea no som ho nneɛma nyinaa;

⁴¹ɔsom ntade a wɔde som kronkronbea hɔ ne ɔsɔfo Aaron ntade kronkron ne ne mma ntade a wɔde bedi asɔfo no.

⁴²Sɛnea AWURADE hyɛɛ Mose no nyinaa, saa ara na Israelfo yɛɛ adwuma no nyinaa.

⁴³Na Mose hwɛɛ adwuma no nyinaa, na hwɛ, wɔayɛ no sɛnea AWURADE hyɛe no, saa pɛ na wɔyɛe. Na Mose hyiraa wɔn.