Read Revised Akuapem Twi DC-KYERƐW KRONKRON Eksodɔs 7 Bible Online

Eksodɔs 7 - Revised Akuapem Twi DC-KYERƐW KRONKRON bible

Eksodɔs 7

¹ Na AWURADE ka kyerɛɛ Mose sɛ: Hwɛ, madan wo Onyankopɔn mama Farao, na wo nua Aaron bɛyɛ wo diyifo.

²Wo de, wobɛka nea mɛhyɛ wo nyinaa, na wo nua Aaron bɛka akyerɛ Farao sɛ ɔmma Israelfo mfi n'asase so nkɔ.

³ Na me de, mepirim Farao koma, na mama me nsɛnkyerɛnne ne m'anwonwade adɔɔso Misraim asase so.

⁴Nanso Farao rentie mo; na mede me nsa mɛto Misraim so, na mayi m'asafo, me man Israelfo no, mafi Misraim asase so wɔ atemmu akɛse mu.

⁵ Na sɛ meteɛ me nsa wɔ Misraim so na miyi Israelfo mifi wɔn mu a, na Misraimfo behu sɛ mene AWURADE.

⁶Na Mose ne Aaron yɛe sɛnea AWURADE hyɛɛ wɔn no ara.

⁷Bere a wɔne Farao kɔkasae no, na Mose adi mfirihyia aduɔwɔtwe, na Aaron nso adi mfirihyia aduɔwɔtwe abiɛsa.

⁸Na AWURADE ka kyerɛɛ Mose ne Aaron sɛ:

⁹ Sɛ Farao ka kyerɛ mo sɛ monyɛ anwonwade bi a, ɛno de ka kyerɛ Aaron sɛ: Fa wo poma to fam wɔ Farao anim, na ɛbɛdan ɔtweaseɛ.

¹⁰Na Mose ne Aaron kɔɔ Farao nkyɛn kɔyɛe sɛnea AWURADE hyɛɛ wɔn no; na Aaron de ne poma no too fam wɔ Farao ne ne nkoa anim, na ɛdan ɔtweaseɛ.

¹¹ Na Farao nso frɛfrɛɛ anyansafo ne ntafowayifo bae. Na wɔn Misraim akɔmfo no nso de wɔn asumansɛm yɛɛ saa ara.

¹²Na wɔn nyinaa de wɔn mpoma totoo fam, na ɛdannan atweaseɛ, nanso Aaron poma no memmenee wɔn mpoma no.

¹³ Na Farao koma pirimii ara, na wantie wɔn, sɛnea AWURADE kae no.

¹⁴Na AWURADE ka kyerɛɛ Mose sɛ: Farao koma yɛ den, ɔmpene sɛ ɔman no bɛkɔ.

¹⁵Kɔ Farao nkyɛn anɔpa; hwɛ, ɔrefi adi akɔ asu no ano; na kogyina asu no ano hyia no, na fa wo poma a ɛdan ɔwɔ no kura.

¹⁶ Ka kyerɛ no sɛ: AWURADE, Hebrifo Nyankopɔn na wasoma me wo nkyɛn sɛ: Ma me man nkɔ nkɔsom me sare so, na hwɛ, wuntiei de abedu sesɛɛ.

¹⁷ Sɛ AWURADE se ni: Eyi na wode behu sɛ mene AWURADE: Hwɛ, mede poma a mikurae yi merebɔ asu yi mu nsu mu, na ɛbɛdan mogya.

¹⁸Na mpataa a ɛwɔ asu no mu bewuwu, na nsu no bɛbɔn na Misraimfo bekyi sɛ wɔbɛnom asu no mu nsu.

¹⁹ Na AWURADE ka kyerɛɛ Mose sɛ: Ka kyerɛ Aaron sɛ: Fa wo poma, na teɛ wo nsa wɔ Misraim nsu so, wɔn nsubɔnten so, wɔn asuasu so ne wɔn atare so ne wɔn nsu a ɛtaataa hɔ nyinaa so, na ɛnnan mogya; na mogya aba Misraim asase nyinaa so, nnua ade ne abo ade mu.

²⁰Na Mose ne Aaron yɛe sɛnea AWURADE hyɛɛ wɔn no; na ɔmaa poma no so, na ɔde bɔɔ nsu a ɛwɔ asu no mu no mu wɔ Farao ne ne nkoa anim; na nsu a ɛwɔ asu no mu nyinaa dan mogya.

²¹Na mpataa a ɛwɔ asu no mu wuwui, na asu no bɔnee, na Misraimfo antumi annom asu no mu nsu, na mogya kataa Misraim asase nyinaa so.

²² Na Misraim akɔmfo de wɔn asumansɛm yɛɛ saa ara. Na Farao koma pirimii ara, na wantie wɔn, sɛnea AWURADE kae no.

²³Na Farao dan ne ho kɔɔ ne fi, na eyi nso wannwen ho.

²⁴Na Misraimfo nyinaa tutuu asu no ho mmura sɛ wɔrepɛ nsu anom, efisɛ wontumi nnom asu no mu nsu.

²⁵Na nnansɔn a AWURADE dan nsu no betwaa mu.