Read Revised Akuapem Twi DC-KYERƐW KRONKRON Hiob 12 Bible Online

Hiob 12 - Revised Akuapem Twi DC-KYERƐW KRONKRON bible

Hiob 12

¹Na Hiob buae sɛ:

²Yoo mone ɔman no nne, na muwu a, nyansa nso bewu.

³Me nso, mewɔ koma sɛ mo, me de, merentɔ mu mo anim; na hena na onnim nneɛma a ɛte sɛɛ yi?

⁴Nea ne yɔnko serew no ne me, nea osu frɛɛ Onyankopɔn na ogyee no so, wɔserew ɔtreneeni a odi mu no.

⁵Nea ɔte hɔ dwoodwoo no tirim de, animtiaabu na ɛfata amanehunu, ɛne nea wɔasiesie ama wɔn a wɔn nan watiriw.

⁶Amimfo ntamadan si hɔ dwoodwoo, na wɔn a wohuru Onyankopɔn bo te hɔ komm, wɔn a wokura wɔn nyame wɔ wɔn nsam no.

⁷Na eyi de bisa mmoa ɛ, na wɔnkyerɛ wo, ne ɔsoro nnomaa nso, na wɔnka wo.

⁸Anaasɛ gyen asase hwɛ, na ɛnkyerɛ wo, na ɛpo mu mpataa nka nkyerɛ wo.

⁹Hena na ɔrenhu eyi nyinaa mu sɛ AWURADE nsa na ɛyɛɛ eyi?

¹⁰ Ne nsam na ɔteasefo biara kra wɔ, ne adasamma nyinaa ahonhom.

¹¹So ɛnyɛ aso na ɛsɔ nsɛm hwɛ, na dodom nso ka aduan hwɛ?

¹² Nkwakoraa mu na nyansa wɔ, na onyinkyɛ ma nhumu.

¹³Ɔno nkyɛn na nyansa ne mmaninne wɔ, ɔno na afotu ne nhumu wɔ no.

¹⁴Hwɛ, oburuw, na wɔrento, ɔto onipa mu, na wɔremmue.

¹⁵ Hwɛ, osianka nsu ma ɛyow, nanso ogyaa mu ma ebutuw asase.

¹⁶Ɔno nkyɛn na ahoɔden ne nyansa wɔ, nea wosisi no ne osisifo nyinaa yɛ ne dea.

¹⁷Ɔpa amananiwafo ho de wɔn kɔ, na ɔma akannifo dan nkwasea.

¹⁸Ɔsan ahene nkyehama, na ɔde nhama kyekyere wɔn asen;

¹⁹ɔpa asɔfo ho de wɔn kɔ, na ɔde wɔn a wɔatim no hwe fam;

²⁰ɔma anotewfo gyae kasa, na ogye mpanyimfo nimdeɛ;

²¹ɔde animtiaabu gu mmapɔmma so, na ohodwow nnɔmmarima abɔso mu;

²²oyi ade kuronkuron adi fi sum mu, na ɔde sum kabii fi ba hann mu;

²³ɔma aman nya nkɔso, na ɔsɛe wɔn; ɔtrɛw amanaman mu, na otu wɔn kɔ;

²⁴ogye asase so aman mu atitiriw koma; na ɔma wokyini asase a ɔkwan nni hɔ so;

²⁵ wɔkeka sum a hann nni hɔ mu, na ɔma wokyini sɛ asabofo.