Read Revised Akuapem Twi DC-KYERƐW KRONKRON Hiob 13 Bible Online

Hiob 13 - Revised Akuapem Twi DC-KYERƐW KRONKRON bible

Hiob 13

¹Hwɛ, m’ani ahu ne nyinaa, m’aso nso ate, na ate ase;

² nea munim no, me nso minim; mentɔ mu wɔ mo mu.

³Me de, mepɛ sɛ anka me ne Otumfo no mmom bɛkasa, na mehwehwɛ sɛ me ne Onyankopɔn beyiyi nsɛm ano.

⁴Na mo de, moyɛ atorofo, ayaresafo ahuhufo ne mo nyinaa.

⁵ Sɛ mumua mo ano mmom koraa a, anka ɛyɛ nyansa ma mo.

⁶Muntie m’atɛnyi, na monyɛ aso mma m’anoyi.

⁷So mobɛka nea ɛnteɛ ama Onyankopɔn, na mode nnaadaa aka ama no?

⁸So mubegye ne ti, anaasɛ mobɛham ama Onyankopɔn?

⁹So ɔhwehwɛ mo mu a, ebesi yiye, anaasɛ mobɛdaadaa no sɛ wɔdaadaa ɔdesani?

¹⁰Sɛ mohwɛ nnipa anim kokoam a, ɔbɛka mo anim ampa.

¹¹So ne kɛseyɛ rentu mo bo, na ne ho hu mma mo so?

¹²Mo mmɛ yɛ nso mmebusɛm, mo anoyi yɛ dɔte anoyi.

¹³Mummua mo ani mfi me so, na me ara menkasa, na nea ɛbɛba me so mmra.

¹⁴Adɛn nti na memfa me honam mintua me se ano, na memfa me kra mento me nsam?

¹⁵Sɛ ɔrekum me mpo a, mehwɛ ɔno ara; m’akwan nko na mɛpere n’anim;

¹⁶eyi ara nso na ɛbɛyɛ me nkwagye, efisɛ ɔbɔnefo remma n’anim.

¹⁷Muntie, muntie nea mewɔ meka, na m’asɛm nkyerɛase nhyɛn mo asom.

¹⁸Hwɛ, masiesie asɛnni mato hɔ, minim sɛ me na medi bem.

¹⁹Hena ne nea ɔne me bɛham? Ɛnne anka mɛyɛ komm na magyaa mu.

²⁰O AWURADE sɛ woyɛ ade abien pɛ ma me a, anka meremfa me ho minhintaw mfi w’anim:

²¹ Yi wo nsa fi me so kɔ akyirikyiri, na mma wo ho hu nnkita me;

²²ɛno na frɛ me, na me nso megye so, anaasɛ mɛkasa, na woabua me.

²³Me bɔne ne me mfomso si ahe ara? Ma minhu me mmarato ne me bɔne.

²⁴ Adɛn nti na wode w’ani hintaw, na wubu me wo tamfo?

²⁵So wubeyi ahaban a mframa de kɔ ahii, na wubetiw nkraadua a aguan?

²⁶ Na wokyerɛw me ho nsɛm yawyaw na woma midi me mmerantebere mu bɔne so ade.

²⁷Wode me nan hyehyɛ ɛpa mu, na wowɛn m’akwan nyinaa, wutwa m’anammɔn ho hye.

²⁸Nso onipa de, ɔporɔw sɛ dufɔkye, sɛ ntama a nwewee redi.