Read Revised Akuapem Twi DC-KYERƐW KRONKRON Hiob 26 Bible Online

Hiob 26 - Revised Akuapem Twi DC-KYERƐW KRONKRON bible

Hiob 26

¹Na Hiob gyee so sɛ:

²Woaboa nea onni tumi dɛn? Dɛn na woayɛ agye basa a enni ahoɔden?

³Afotu bɛn na woatu nea onni nyansa, na woaka nimdeɛsɛm pa a ɛdɔɔso anaa?

⁴Hena na woaka nsɛm akyerɛ no, na hena ahome na afi wo mu yi?

⁵Nsamanfo ho yeraw wɔn, nsu ne wɔn a wɔte mu no ase.

⁶ Asamando da adagyaw n’anim, na nkataso biara nni hɔ mma ɔsɛe amoa.

⁷Ɔno na ɔtrɛw ɔsoro a ebiri no mu ahunmu, na ɔde asase sɛn nea biribi nni.

⁸ Ɔkyekyere nsu hyɛ amununkum mu, nanso omununkum no mpae wɔ ase.

⁹Ɔbram n’ahengua anim de ne mununkum katakata ho.

¹⁰ Otwa nsu ani hye de kosi nea hann ne sum awiei hyia hɔ.

¹¹Ɔsoro nnyinaso hinhim, na wɔn ho dwiriw wɔn, n’ateɛteɛ ano.

¹²Ɔde ne tumi nu ɛpo mu, na ɔde ne nhumu brɛ Po mu bɔpɔn ase.

¹³ Ne honhom ano na ɔsoro tew, ne nsa na ehwirew ɔwɔ a ne ho yɛ hare no mu.

¹⁴Hwɛ, eyinom ne n’akwan ano ano, na ɛho asomusɛm bi nko na yɛte, na ne mmaninyɛ prannaa a ɛbom no, hena na obehu mu?