Read Revised Akuapem Twi DC-KYERƐW KRONKRON Hiob 28 Bible Online

Hiob 28 - Revised Akuapem Twi DC-KYERƐW KRONKRON bible

Hiob 28

¹Yiw dwetɛ wɔ ne nkommena, na afa wɔ hɔ ma sika a wɔhoro.

²Dade nso wotu no fam, na wɔnan abo yɛ kɔbere.

³Onipa ma esum to twa, na ɔhwehwɛ kodu akyirikyiri pɛ sum kabii ne sunsum mu abo.

⁴Wotu nkron nea obi nte hɔ, anammɔn a etwam werɛ fi no, ɔsensɛn hɔ, wodi ahim nea ɔdesani bi nni hɔ.

⁵Asase wɔ hɔ yi, aduan fi mu ba, na n’ase nso, wɔdan ani sɛ ogya.

⁶Hoabo dabea ne n’abo no mu, na sikafuturu nso wɔ hɔ.

⁷Ɛyɛ ɔkwan a ɔkɔre po nnim, na akoroma aniwa nhui da,

⁸anworanworammoa ntiatiaa so, na gyatabiri mfaa hɔ.

⁹Ɔteɛ ne nsa ka ɔbohemmaa, obutuw mmepɔw ne ntini mu.

¹⁰Otwitwa aka abotan mu, na n’aniwa hwɛ aboɔdenne nyinaa.

¹¹ Osisiw asuasu kwan na ansosɔ, na ade a ahintaw no, oyi ba hann mu.

¹²Na nyansa de, ɛhe na wobehu, na ɛhe na nhumu afa wɔ?

¹³Ɔdesani nnim ne bo, na wonhu ateasefo asase so.

¹⁴Obon donkudonku ka sɛ: Enni me mu. Na ɛpo ka sɛ: Enni me hɔ.

¹⁵ Wɔmfa sika amapa nsi ananmu nnye, na wɔnkari dwetɛ ntua ne ti bo.

¹⁶ Wɔnkari no Ofir sika so ntɔ, wɔmfa apopobibiribo a ne bo yɛ den ne hoabo ntɔ.

¹⁷Wɔmfa sika ne ahwehwɛ nto ho, na wɔmfa sika nnwinne nsesa.

¹⁸Wɔmmɔ nhene panyin ne abo a ɛhyerɛn din, na nyansa bo sen nhene pa de.

¹⁹ Etiopia asase so akrate bo ne no nsɛ, na wɔmfa sika amapa nkyerɛ ne bo.

²⁰Ɛnne ɛhe na nyansa fi ba? Na ɛhe na nhumu tenabea wɔ?

²¹Wɔde ahintaw ateasefo nyinaa aniwa, wɔakata so ɔsoro nnomaa anim.

²²Ɔyera amoa, ne owu ka sɛ: Yɛde yɛn aso ate ne nka.

²³ Onyankopɔn na ohu ne kwan mu, na ɔno na onim ne tenabea;

²⁴na ɔno na ɔhwɛ asase awiei, ɔsoro ase nyinaa nso, ohu.

²⁵ Ɔhyɛɛ mframa duru too hɔ, na ɔhyɛɛ nsu sɛ ne nsusuwii te no,

²⁶bere a ɔhyɛɛ osu ahyɛde, na ɔyɛɛ ɔkwan maa n’aprannaa asraman no,

²⁷ɛno na ohui na oyii no adi; ɔde sii hɔ na ɔpɛɛpɛɛ mu.

²⁸ Na ɔka kyerɛɛ onipa sɛ: Hwɛ, AWURADE suro, ɛno ne nyansa, na bɔne ho fi, ne nhumu.