Read Revised Akuapem Twi DC-KYERƐW KRONKRON Hiob 38 Bible Online

Hiob 38 - Revised Akuapem Twi DC-KYERƐW KRONKRON bible

Hiob 38

¹ Na AWURADE fi ahum no mu buaa Hiob sɛ:

² Hena ne nea obiri afotu ani, nsɛm a emu nni nimdeɛ mu yi?

³ Bɔ w’asen sɛ ɔbarima ɛ, na memmisa wo, na kyerɛ me.

⁴Ɛhe na wowɔ, bere a metoo asase fapem no? Sɛ wowɔ nhumu a, ka ɛ!

⁵Hena na ɔde ne nsusuwii too hɔ, wunim anaa? Anaasɛ hena na ɔsaa so hama?

⁶Dɛn so na wɔde ne nnyinaso sii, anaa hena na ɔde ne tweati bo toe,

⁷bere a adekyee nsoromma boom too ahurusi dwom, na Ɔsoro dɔm nyinaa bɔɔ ose no?

⁸Na hena na ɔkaa po hyehyɛɛ apon mu, bere a efii asase yam puei,

⁹na mede omununkum meyɛɛ ne nkataho, ne sum kabii nso meyɛɛ n’abomu hann,

¹⁰ na mitwaa no so hye, na misisii adaban ne apon,

¹¹ na mekae sɛ: Ɛha yi na bra bedu, na ntra so, na ɛha ara na w’asorɔkye ahantan mmɛso no?

¹²So efi wo nna mfiase woahyɛ bere ama anɔpa pɛn? So woakyerɛ adekyee nso ne dibere,

¹³sɛ enso asase mmuano mu, na wɔmporoporow abɔnefo mfi so,

¹⁴sɛ ɛnsakra sɛ dɔte nsɔano ase, na ɛnyɛ sɛ atade a wɔahyɛ no aduru,

¹⁵na wɔde abɔnefo hann akame wɔn, na nsa a wɔama so no, wɔabu mu?

¹⁶So woakɔ po aniwa ho, na woanantew bun donkudonku ase?

¹⁷So wɔayi owu aponkɛse adi akyerɛ wo, anaasɛ woahu esum kabii abobow no?

¹⁸Woahu asase trɛw mu anaa? Sɛ wunim ne nyinaa a, ka ɛ!

¹⁹Ɛhe na hann tenabea kwan wɔ, na esum nso, n’afa wɔ he?

²⁰Na wode akɔ ne hye so, na woahu ne fi akwan no?

²¹Yiw wunim, efisɛ saa bere no na wɔwoo wo, na woadi nna bebree.

²²So woakɔ sukyerɛma korabea, anaa woahu amparuwbo akorae no,

²³ ade a makora masie ahohia bere ne ɔko ne dɔmdi da no?

²⁴Ɛhe na ɔkwan a hann nam so hyerɛnhyerɛn no wɔ, ne nea apuei mframa fa so bɔ asase so no wɔ?

²⁵ Hena na oyiyi aka ma osu, ne ɔkwan ma aprannaa asraman no,

²⁶sɛ ɔbɛma osu atɔ asase a obi nni hɔ so, ne anwea pradada a onipa bi nni so so,

²⁷na wama amamfo ne asase hunu amee, na wama wura a efuw no afefɛw?

²⁸So osu wɔ agya, anaasɛ hena na ɔwo obosu a ɛsosɔ?

²⁹ Hena yam na nsu nkyenkyenee fi, na ɔsoro bosu a akyenkyen no, hena na ɔwoe?

³⁰Nsu kyenkyen sɛ ɔbo, na ebun donkudonku ani pam.

³¹ So wubetumi akyekyere Akokɔtan-ne-ne-mma hama, anaasɛ wubetumi asan Nyɛnkrɛnte nhama mu?

³²So wubetumi ayi owiakwanmu nsoromma adi wɔ ne bere mu, anaa wubetumi akyerɛ sisi nsoromma ne ne mma kwan?

³³So wunim ɔsoro nhyehyɛe anaa wubetumi ahyehyɛ sɛnea enni asase so mfa?

³⁴So woma wo nne so kɔ amununkum mu sɛ nsu pii mmɛkata wo ho anaa?

³⁵So wubetumi asoma anyinam ma akɔ, na aka akyerɛ wo sɛ: Yɛn ni! Anaa?

³⁶Hena na ɔde nyansa siee ayamde mu, anaasɛ hena na ɔde nhumu maa adwene?

³⁷ Hena na ɔde nyansa kenkan amununkum, na ɔsoro nkotoku no, hena na ɔdan no

³⁸ma mfutuma twe kɔhɔre siw, na dɔte bɔ atɔwatɔw?

³⁹So wo na woyɛ ha ma gyatabere nya nam, anaa woma agyataforo mee,

⁴⁰ ɛbere a wobutubutuw wɔn atu mu, na wɔtete adɔtɔ mu retɛw no?

⁴¹ Hena na osiesie aduan ma anene, ɛbere a ne mma su frɛ Onyankopɔn, wokyini na wonni aduan no?