Read Revised Akuapem Twi DC-KYERƐW KRONKRON Hiob 4 Bible Online

Hiob 4 - Revised Akuapem Twi DC-KYERƐW KRONKRON bible

Hiob 4

¹Ɛnna Temanni Elifas bua kae sɛ:

²Sɛ obi ka asɛm yi ho bi kyerɛ wo a, ɛbɛyɛ wo ahometew anaa? Nanso etwa sɛ mekasa ara?

³Hwɛ, wo na woateɛteɛ nnipa bebree so, na nsa a agow no, woahyɛ no den;

⁴wo nsɛm ama nea ɔrebɛhwe ase agyina, na nankoroma a agurow no, woahyɛ no den.

⁵Na afei ɛtoo wo yi, woagyigya, ɛkaa wo yi, woayɛ basaa.

⁶So ɛnyɛ wo nyamesuro ne nea wode wo ho to so, na w’akwan a ɛteɛ ne w’anidaso?

⁷Kae ɛ, hena na ɔnyɛɛ bɔne bi na wɔasɛe no, anaa ɛhe na wɔapopa atreneefo pɛn?

⁸ Manya no nhui sɛ wɔn a wɔfɛntɛm amumɔyɛ na wogu mmusu no, ɛno ara na wotwa.

⁹Onyankopɔn home sɛe wɔn, na wɔhyew, n’abufuw mframa ano.

¹⁰Sɛnea Gyata mmobɔm ne ɔsebɔ nne gyae, na gyataforo sebɔmmɔfo tutu no, saa ara

¹¹na gyataforo nnya hanam nti owu, na gyatabere mma bɔ pete.

¹²Na me de, asɛm bi wiawiaa ne ho baa me nkyɛn, na m’aso tee ɛho asutu bi.

¹³Ɔdadwen a efi anadwo adehu mu mu, bere a nnahɔɔ atɔ nnipa so no,

¹⁴ ehu ne ahopopo kaa me, na ɛmaa me nnompe nyinaa wosowee.

¹⁵Na honhom bi twaam faa m’ani so, me ho nwi nyinaa sɔre gyinagyinae,

¹⁶egyinae, nanso manhu ne su, suban bi gyinagyina m’ani so, metee nne bɔkɔɔ bi sɛ:

¹⁷So ɔdesani teɛ sen Onyankopɔn, anaa onipa ho tew sen ne yɛfo?

¹⁸ Hwɛ, ne nkoa po, ɔmfa ne ho nto wɔn so, na n’abɔfo no, obu wɔn sɛ wɔtɔ mu;

¹⁹ na menne wɔn a wɔte dɔte adan mu, na wɔn nnyinaso wɔ mfutuma mu, na wofurofurow wɔn sɛ abubummabaa.

²⁰Efi anɔpa kosi anwummere na wɔaposaw wɔn; wɔyera korakora a obi nnwen ho.

²¹Sɛ wɔtetew wɔn ho ntamadan hama a, so ɛnyɛ owu na wowu a wɔanhu nyansa bi?