Read Revised Akuapem Twi DC-KYERƐW KRONKRON Hiob 40 Bible Online

Hiob 40 - Revised Akuapem Twi DC-KYERƐW KRONKRON bible

Hiob 40

¹Na AWURADE buaa Hiob sɛ:

² So ɔtɛnyifo bi ne Otumfo no bɛham anaa? Nea ɔne Nyankopɔn gye akyinnye no, ommua ɛ!

³Na Hiob gyee AWURADE so sɛ:

⁴Hwɛ, misua, dɛn na memfa mimmua wo? Me nsa na mede meto m’ano.

⁵Makasa pɛnkoro, na merentia so, ne mprenu, na merenkɔ so bio.

⁶Ɛnna AWURADE fi ahum no mu buaa Hiob sɛ:

⁷ Bɔ w’asen sɛ ɔbarima ɛ, mebisa wo, na woakyerɛ me.

⁸So wobɛdan m’atemmu ani, so wubebu me fɔ na woadi bem?

⁹ Na so wowɔ nsa sɛ Onyankopɔn de, na wubetumi de nne a ɛte sɛ ne de abom?

¹⁰Ɛnne fa tumidi ne kɛseyɛ hyehyɛ wo ho, na fura ɔhyerɛn ne anuonyam,

¹¹hwie w’abufuw mmoroso no gu, na hwɛ ɔhantanni biara na brɛ no ase.

¹²Hwɛ ahantanfo nyinaa na brɛ wɔn ase, na tiatia abɔnefo so wɔn tenabea hɔ.

¹³Fa wɔn nyinaa sie dɔte mu, na ma wɔn anim ntintim ahintawee mu,

¹⁴ɛnne na me nso mɛkamfo wo sɛ w’ankasa wo nifa na agye wo.

¹⁵Hwɛ susono a meyɛɛ no ne wo, wura na odi sɛ nantwi.

¹⁶Hwɛ ne tumi a ɛwɔ n’asen mu ne n’ahoɔden a ɛwɔ ne yafunu ntini mu.

¹⁷Ɔkoa ne dua sɛ kyeneduru, ne srɛ mu nhama nso toatoa mu.

¹⁸Ne nnompe te sɛ kɔbere dorobɛn, ne nkasae te sɛ adaban.

¹⁹Ɔno ne Onyankopɔn akwan mfiase na ne yɛfo no nkutoo na otumi de afoa ka no.

²⁰Na mmepɔw ba aduan ma no, na wuram mmoadoma nyinaa goru hɔnom.

²¹Nsɔe nnua ase na ɔda, demmire ne ɔwora ahintawee mu.

²²Nsɔe nnua nwini kata no so, asukɔn so nnua twa ne ho hyia.

²³Hwɛ, asu ano yɛ den mpo a, ne ho mpopo; sɛ Yordan bu ba n’ano po a, ne bo da ne yam ara.

²⁴So wobetumi akyere no anikan, na wɔde afiri ahwirew ne hwenem?