Read Revised Akuapem Twi DC-KYERƐW KRONKRON Hiob 42 Bible Online

Hiob 42 - Revised Akuapem Twi DC-KYERƐW KRONKRON bible

Hiob 42

¹Ɛnna Hiob gyee AWURADE so sɛ:

²Mahu sɛ wutumi ade nyinaa yɛ, na wɔrensiw w’atirimmɔ biara kwan.

³ Hena ne nea onni nimdeɛ, na ɔfono afotu ani yi? Enti na mekaa nea mente ase, anwonwade a ɛsen me a minnim.

⁴ Tie ɛ, na menkasa. Mebisa wo, na woakyerɛ me.

⁵Sɛ aso te nko na metee wo nka, na afei m’aniwa ahu wo.

⁶Enti na m’ani wu na minu me ho, dɔte ne nso mu.

⁷Na AWURADE kaa nsɛm yi kyerɛɛ Hiob wiei no, AWURADE ka kyerɛɛ Temanni Elifas sɛ: Me bo afuw wo ne wo mfɛfo baanu no, efisɛ moanka me ho asɛm a ɛteɛ sɛnea m’akoa Hiob ayɛ no.

⁸ Na afei momfa anantwinini ason ne adwennini asɔn, na monkɔ m’akoa Hiob nkyɛn, na monkɔbɔ ɔhyew afɔre mma mo ho, na m’akoa Hiob mmɔ mo ti so mpae, na ne nko anim na mɛhwɛ, na me ne mo anni no mo nkwaseasɛm so, efisɛ moanka me ho asɛm tee sɛ m’akoa Hiob.

⁹Ɛnna Temanni Elifas ne Suhini Bildad ne Naamani Sofar siim kɔe kɔyɛe sɛnea AWURADE ka kyerɛɛ wɔn no; na AWURADE tiee Hiob mpaebɔ.

¹⁰ Na Hiob bɔɔ ne nnamfo no ti so mpae no, AWURADE dan ne duamda no, na AWURADE de ade a Hiob nyae no nyinaa mmɔho abien maa no.

¹¹Ɛnna ne nuanom mmarima nyinaa ne ne nuanom mmea nyinaa ne wɔn a wonim no kan nyinaa baa ne nkyɛn, na wɔne no bedidii wɔ ne fi, na wogyam no, na wɔkyekyee ne werɛ, amane a AWURADE ma ɛbaa no so nyinaa ho, na wɔn mu biara maa no sika dwetɛbona biako ne sika kaa biako.

¹²Na AWURADE hyiraa Hiob awiei sen ne mfiase, na onyaa nguan ɔpeduanan ne yoma mpemnsia ne anantwi mpamho apem ne mfurum abere apem.

¹³Na onyaa mmammarima baasɔn ne mmammea baasa.

¹⁴Na ɔtoo ɔbea a odi kan no din Yemima, na nea odi so no de Kesia, na nea ɔto so abiɛsa no de Keren-hapuk.

¹⁵ Na wɔanhu mmea ahoɔfɛfo sɛ Hiob mmammea no asase no nyinaa so; na wɔn agya momaa wɔn agyapade wɔn nuanom mu.

¹⁶Na eyi akyi no, Hiob dii mfirihyia ɔha aduanan, na ohuu ne mma ne ne mma mma awo ntoatoaso anan.

¹⁷ Na Hiob wui, na wabɔ akora pa ara.