Read Revised Akuapem Twi DC-KYERƐW KRONKRON Hiob 5 Bible Online

Hiob 5 - Revised Akuapem Twi DC-KYERƐW KRONKRON bible

Hiob 5

¹Frɛ ɛ, so obi wɔ hɔ a obebua wo? Na akronkronfo mu hena na wode bɛdan no?

²Na ahisɛm kum ogyimifo, na ninkuntwe kum atetekwaa.

³ Me de, mahu ogyimifo a ogyee ntini, nanso amonom hɔ ara na medomee ne tenabea;

⁴ne mma ne nkwagye ntam pan, na wɔpɛtɛw wɔn, kurow pon mu a ogyefo nni hɔ.

⁵Wɔn a wodi kɔm bedi ne nnɔbae, na nsɔe mu po na wɔbɛfa, na adifudepɛfo amene wɔn adedodow.

⁶Efisɛ mmusu mfifi mfi mfutuma mu, na ɔhaw nso mfuw mfi fam.

⁷Na wɔwoo onipa maa ɔhaw, sɛ ogyaframa tutu kɔ soro no.

⁸Na me a, anka mɛhwehwɛ Onyankopɔn akyi kwan, na mede m’asɛm mahyɛ Onyankopɔn nsa,

⁹ nea ɔyɛ adekɛse a enni nhwehwɛm, anwonwade nso a wontumi nkan.

¹⁰Nea ɔma osu tɔ asase so, na ɔma nsu ba wuram,

¹¹ ɔde ahobrɛasefo bɛtenaa nea ɛkorɔn, na nkɔmmɔdifo asɔre akɔ yiyedi mu.

¹²Ɔsɛe aniferefo atirimpɔw, na wɔn nsa antumi anyɛ adepa bi.

¹³ Ɔkyere anyansafo wɔn anifere mu, na obutuw akɔntɔnkyefo agyina.

¹⁴ Wɔtɔ sum mu awia, na awia ketee wɔkeka sɛ anadwo.

¹⁵Na ogye ohiani fi afoa a efi wɔn anom no ano, ne ɔhoɔdenfo nsam.

¹⁶Na ɔbrɛfo nya anidaso, na amumɔyɛ mua n’ano.

¹⁷ Hwɛ, nhyira ne ɔdesani a Onyankopɔn ka n’anim, na otumfo nteɛso no, ɔmpo!

¹⁸ Na ɔno na opira, na ɔkyekyere so, ɔpɛtɛw, na ne nsa nso sa.

¹⁹ Obeyi wo afi ahohia asia mu, na nea ɛto so ason no mu, bɔne renka wo.

²⁰Ɔkɔm bere obegye wo afi owu mu, na akodi mu nso wagye wo afi afoa ano.

²¹Ɔbɛkora wo afi tɛkrɛma mpire ano, na worensuro ɔsɛe a ɛreba.

²²Wobɛserew ɔsɛe ne ɔkɔm, na asase so mmoadoma nso, worensuro wɔn.

²³ Efisɛ wo ne wuram abo po bɛyɛ apam, na wuram mmoadoma bedwo ama wo.

²⁴Na wubehu sɛ wo ntamadan si hɔ dwoodwoo, na wohwɛ wo tenabea a, worenhu sɛ atɔ mu.

²⁵Na wubehu nso sɛ w’asefo bɛdɔɔso pii, na wɔn a wofi wo mu bɛyɛ sɛ asase so nhaban,

²⁶wode onyinkyɛ na ɛbɛkɔ ɔdamoa mu, sɛ wɔde awi afiafi ba mu ne bere mu no.

²⁷Hwɛ, eyi na yɛabɔre mu ahu, sɛ ɛte ni; tie, na wo nso, hu fa!