Read Revised Akuapem Twi DC-KYERƐW KRONKRON Hiob 6 Bible Online

Hiob 6 - Revised Akuapem Twi DC-KYERƐW KRONKRON bible

Hiob 6

¹Na Hiob gyee so sɛ:

²Sɛ anka wɔkari m’awerɛhow, na wɔde me yaw nso gu nsenia mu ma so ɛ!

³Ɛno de anka ɛbɛsen mpoano nwea mu duru, enti na me nsɛm ayɛ hyerebahyereba yi,

⁴ na Otumfo agyan tuatua me mu, me honhom renom emu bɔre, Onyankopɔn ahiiyide atwa me so mpasua.

⁵So torɔm nya sare momono a, ɔteɛteɛm? Anaa nantwi su n’afrafraduan so?

⁶So wodi aduan hunu a nkyene nni mu? So dɛ bi wɔ nkosua ho fufu mu?

⁷Ade a me kra ampɛ sɛ ɛbɛka me no, ɛno ara na ayɛ me aduan a ɛyɛ me nwini.

⁸Oo, sɛ anka menya nea mibisa, na Onyankopɔn bɛma me nea m’ani gyina no ɛ!

⁹Sɛ anka Onyankopɔn pene na ɔpɛtɛw me, na ɔto ne nsa ɔkwan na etwa me ɛ!

¹⁰Anka ɛbɛyɛ me awerɛkyekye ara na madi ahurusi, ɛyaw a ɛnkyɛe me so no mu, efisɛ mensan ɔkronkronni no nsɛm no ɛ!

¹¹M’ahoɔden ne dɛn, sɛ mede mɛtɔ me bo ase, na m’awiei ne dɛn, sɛ me kra bɛkyɛ ho?

¹²So m’ahoɔden yɛ abo ahoɔden, so me honam yɛ kɔbere?

¹³So ɛnyɛ ɔboa bi na enni me mu, na wɔatu ahoɔden afi me ho?

¹⁴Nea n’ahome tew no no, ɛsɛ no ne yɔnko nsam adɔe; anyɛ saa a, ogyaa Otumfo no suro.

¹⁵ Me nuanom twa nkontompo sɛ asusosuwa, sɛ asubon a emu nsuwansuwa resen kɔ.

¹⁶Nsukyenee nti ani fono, sukyerɛma hyɛn mu hintaw.

¹⁷Sɛ ɔhyew ka no a, ɛyera, ahohuru mu ɛyera fi n’afa,

¹⁸n’akwantemfo no akwan kɔntɔnkɔntɔn, ɛdan huruhuro kɔ soro na ɛyera.

¹⁹ Tema akwantemfo asafo no hwɛe, Seba anantefo ani daa so,

²⁰wɔn ani wui sɛ wɔde wɔn ani too so, wokoduu ho, na wɔn anim guu ase.

²¹Na afei saa ara mote, moahu m’awerɛhow yi, nso moannya tema biara amma me.

²²So maka sɛ mommrɛ me biribi, na me nti momfa mo ade bi nkyɛ,

²³na munyi me ɔhohiafo nsam, na munnye me mfi nhyɛsofo nsam anaa?

²⁴Monkyerɛkyerɛ me, na mɛyɛ komm, na nea mafom so no, momma minhu.

²⁵Monhwɛ sɛnea asɛntrenee yɛ den fa! Na mo ntɛnyi yi de, animka bɛn na ɛwom?

²⁶So nsɛm ho animka na mudwen? Ɔwerɛhowni nsɛm te sɛ mframa.

²⁷Ayisaa so mpo morebɔ ntonto, na mo yɔnko ti nso moredi ano.

²⁸Na afei mompɛ ani pa nhwɛ me, na merenni atoro mo anim ha.

²⁹Mompɛ mu bio ɛ, na mummmu ntɛnkyew; na monsan mpɛ mu, na m’asɛm wom ara.

³⁰So nea ɛnteɛ bi wɔ me tɛkrɛma so, anaasɛ me dodom nhu abusude?