Read Revised Akuapem Twi DC-KYERƐW KRONKRON Hiob 7 Bible Online

Hiob 7 - Revised Akuapem Twi DC-KYERƐW KRONKRON bible

Hiob 7

¹ So ɛnyɛ akodi na ɛwɔ hɔ ma ɔdasani asase so na ne nna te sɛ ɔpaani nna?

²Sɛ akoa pere onwini ho, ne sɛ ɔpaani hwɛ n’apaade kwan no,

³saa ara na wɔama madi asram hunu, na wɔabu ɔhaw anadwo ama me.

⁴Sɛ mekɔda a, meka sɛ: Da bɛn na mɛsɔre na anadwo atwam akɔ? Nna mu aperepere fono me kosi ahemadakye.

⁵Me honam fura mmoawa ne dɔte abon, me were ayɛ twaa, na ɛrefi nsu.

⁶ Me nna yɛ hare sen ɔnwemfo akurokurowa, na ɛrehi, na anidaso bi nni hɔ.

⁷Kae sɛ me nkwa yɛ mframa, m’aniwa rensan nhu papa.

⁸Nea ohu me aniwa renhu me bio, w’ani tua me, nso na minni hɔ.

⁹Sɛnea omununkum sa na ɛkɔ no, saa ara na nea osian kɔ asaman no remforo mma bio.

¹⁰ Ɔrensan mma ne fi bio, na ne tenabea renhu no bio.

¹¹Enti me nso meremmua m’ano, mɛkasa me honhom ahohia mu, mesi apini m’awerɛhow mu.

¹²So meyɛ ɛpo anaa asu mu bɔpɔn, na ɛma wode awɛmfo sisi me ho?

¹³Sɛ mise: Me mpa bɛkyekye me werɛ, na me dabere bedwudwo m’apinisi no a,

¹⁴ɛnne wode adaeso hyɛ me yaw, na anisoadehu mu na woma mebɔ piriw.

¹⁵Na ɛma me kra paw menewamsiw ne owu sen me nnompe yi.

¹⁶ Afono me, merentena ase daa. Gyaa me, na me nna yɛ huruhuro.

¹⁷ Ɔdesani ne hena a wubu no ɔkɛse, na wudwen ne ho?

¹⁸Na wohwɛ no daa anɔpa, na wotaa sɔ no hwɛ ara?

¹⁹Worenyi w’ani mfi me so de rekosi da bɛn? Wonto me kwan na memmene me ntasu po?

²⁰Mayɛ bɔne a, dɛn na mayɛ wo, nnipa hwɛfo, ɛdɛn na wode me ayɛ w’ade a wo ne no anya na madan adesoa ama me ho?

²¹Na adɛn na womfa me mmarato nkyɛ, na womma me mfomso nsen nkɔ? Na afei mɛda mfutuma mu, na wobɛhwehwɛ me.