Read Revised Akuapem Twi DC-KYERƐW KRONKRON Hiob 9 Bible Online

Hiob 9 - Revised Akuapem Twi DC-KYERƐW KRONKRON bible

Hiob 9

¹Na Hiob gyee so sɛ:

² Ampa ara, minim sɛ ɛte sa, na ɔdesani bɛteɛ Onyankopɔn anim dɛn?

³ Sɛ obi pɛ sɛ ɔne no yiyi ano a, ontumi mmua no apem mu biako mpo.

⁴Koma mu nyansafo ne tumi mu hoɔdenfo no, hena na wasen ne kɔn wɔ ne so na asi no yiye?

⁵Otutu mmepɔw mpatuw mu, obutuw no n’abufuw mu.

⁶Ɔwosow asase fi n’atenae, na ne nnyinaso popo.

⁷Ɔhyɛ owia, na empue; na ɔsosɔ nsoromma ano.

⁸ Ɔno nko na ɔtrɛw ɔsoro, na otiatia po asorɔkye so.

⁹ Ɔyɛ Nsorommasɔn, Nyɛnkrɛnte ne Akokɔtan ne ne mma ne anafo fam mpiakyiri.

¹⁰ Ɔyɛ ade akɛse a enni nhwehwɛm, ne anwonwade a wontumi nkan.

¹¹Hwɛ, otwa me ho, nso minhu no, ɔsen, nso minhu no.

¹²Hwɛ, ohwim kɔ, hena na ɔbɛsan no? Hena na ɔbɛka akyerɛ no sɛ: Dɛn na woreyɛ yi?

¹³ Onyankopɔn rensianka n’abufuw, Rahab aboafo brɛ wɔn ho ase wɔ n’ase.

¹⁴Na menne sɛ me na mebua no, anaasɛ mɛhwehwɛ me nsɛm mu, na me ne no ayiyi.

¹⁵Ɔno na sɛ meteɛ po a, meremmua no, mɛkotɔ no sɛ me temmufo.

¹⁶Sɛ mefrɛ na ogye me so a, merennye minni sɛ ɔbɛyɛ aso ama me nne.

¹⁷Ɔno a ɔde ahum posa me, na ɔma m’akuru dɔɔso kwa no,

¹⁸ɔmma minnya ahomeye, na ɔde awerɛhow hyɛ me ma tɔ.

¹⁹ Sɛ wodi no ɔhoɔdenfo tumi so a, anka: Mini! Na sɛ atemmu nso a, anka: Hena na obehyia me?

²⁰Sɛ meteɛ a, m’ano bebu me fɔ, na midi mu a, ɔbɛma makyea.

²¹Me de, midi mu de, nanso mimmu me ho; me nkwa afono me.

²² Ne nyinaa yɛ biako; enti na mise: Nea odi mu ne ɔbɔnefo nyinaa na ɔsɛe wɔn.

²³Sɛ mpire kum mpofirim a, ɔsereserew wɔn a wodi bem amane.

²⁴Wɔde asase ahyɛ ɔbɔnefo nsa, ɔkata n’atemmufo ani; sɛ ɛnyɛ ɔno a, na ɛyɛ hena?

²⁵Na me nna ho yɛ hare sen ommirikatufo, eguan kɔ, enhu adepa bi.

²⁶Ɛsen kɔ sɛ demmire nkyɛkyerɛ hyɛn, sɛ ɔkɔre a ɔtow si aduan so.

²⁷Sɛ mise: Me werɛ befi m’apinisi, megyae bosooyɛ na matew m’anim po a,

²⁸me yaw nyinaa yɛ me hu, efisɛ mihu sɛ woremmu me bem.

²⁹Na sɛ wobebu me fɔ a, adɛn nti na memmrɛ ngu?

³⁰Sɛ miguare sukyerɛma nsu na mede gyakisi mehohoro me nsa a,

³¹ɛno nso wode me bɛto amoa mu, na me ho ayɛ me ntade po nwini.

³²Na ɔnyɛ onipa sɛ me, na mabua no, na yɛn baanu ahyiam abɔ nkuro.

³³Nso ɔsentwamfo bi nni yɛn ntam a ɔde ne nsa bɛto yɛn baanu so.

³⁴Ma onyi n’abaa mfi me so, na ne ho hu ankita me.

³⁵Ɛnna anka mɛkasa a merensuro no, nanso mintumi nyɛ saa, wɔ me ara me fam.