Read Revised Akuapem Twi DC-KYERƐW KRONKRON Nnwom 109 Bible Online

Nnwom 109 - Revised Akuapem Twi DC-KYERƐW KRONKRON bible

Nnwom 109

¹Wɔde ma dwonkyerɛfo. Dawid dwom M’ayeyi Nyankopɔn, mmua w’ano.

²Na abɔnefo ne nkontompofo abue wɔn ano ahyɛ me, wɔde atoro tɛkrɛma akeka me ho nsɛm,

³na wɔde nitansɛm atwa me ho ahyia, na wɔne me di ako kwa.

⁴Wɔtan me de hyɛ me dɔ ananmu, na me de, mpae ara na mebɔ.

⁵ Na wɔde bɔne hyɛ me papa ananmu, na wokyi me de hyɛ me dɔ ananmu.

⁶Fa ɔbɔnefo si no so, na ma Satan nnyina ne nifa.

⁷Wobu no atɛn a, ma onni fɔ, na ma ne mpaebɔ nnan no bɔne.

⁸ Ma ne nna nsua, na ne hwɛ adwuma no, ma obi mfa,

⁹ne mma nyɛ nyisaa, na ne yere nnan okunafo,

¹⁰na ne mma nkyinkyin nsrɛsrɛ ade, na womfi wɔn amamfo so nkɔhwehwɛ aduan.

¹¹Ma ɔpempensifo nsa nka nea ɔwɔ nyinaa, na ananafo mfow n’adwuma so ade.

¹²Mma obiara nnyɛ no adɔe, na obiara nnnom ne nyisaa.

¹³Ma wɔntɔre n’ase, ma wɔn din ngu awo ntoatoaso a edi so yi mu.

¹⁴ Wɔnkae n’agyanom amumɔyɛ AWURADE anim, na ne na bɔne nso, wɔmmpopa.

¹⁵ Ɛntena AWURADE anim daa, na ontwa wɔn ho nkae mfi asase so.

¹⁶Esiane sɛ wankae sɛ ɔbɛyɛ adɔe, na ɔtaa onipa mmɔboroni ne ohiani ne nea ne koma abubu, sɛ obekum wɔn.

¹⁷Sɛ ɔdɔɔ nnuabɔ nti, aba no so, sɛ wampɛ nhyira nti, ɛne no ntam pan.

¹⁸ Ɔhyɛɛ nnome sɛ n’atade, na ɛkɔɔ ne yam sɛ nsu, ne ne nnompe mu sɛ ngo.

¹⁹Ma ɛnyɛ no sɛ ntama a ofura ne abɔso a ɔde kyekyere ne ho daa.

²⁰Eyi ne me ho asɛmpɛfo akatua a efi AWURADE nsam, ne wɔn a wɔka me kra ho asɛmmɔne no de.

²¹Na wo, AWURADE, wo din nti di ma me, na w’adɔe no ye, yi me!

²²Na meyɛ mmɔboroni ne hiani, na me koma apira wɔ me mu.

²³Mekɔ sɛ sunsuma a ɛrekɔtɔ, wɔawosow me akyene sɛ mmɛbɛw.

²⁴Abuada nti me nkotodwe popo, na me honam afɔn, na srade apa mu.

²⁵ Na me de, madan ahohora mama wɔn, wɔhwɛ me a, wɔwosow wɔn ti.

²⁶Boa me, AWURADE, me Nyankopɔn, gye me sɛnea w’adɔe te,

²⁷na wonhu sɛ wo nsa ni, sɛ wo, AWURADE, na woyɛe.

²⁸ Wɔn de, wɔdome, na wo de, wuhyira; wɔsɔre, na wɔn ani wu, na w’akoa de, n’ani gye.

²⁹ Me ho asɛmpɛfo bɛhyɛ aniwu, na wɔafura wɔn ahohora sɛ ntama.

³⁰Mede m’ano mɛkamfo AWURADE pii, mɛto ayeyi dwom mama no nnipa bebree mu,

³¹sɛ ogyina ohiani nifa, na ɔregye no afi wɔn a wobu ne kra atɛn nsam.