Read Revised Akuapem Twi DC-KYERƐW KRONKRON Nnwom 116 Bible Online

Nnwom 116 - Revised Akuapem Twi DC-KYERƐW KRONKRON bible

Nnwom 116

¹Medɔ AWURADE sɛ otie me nne ne me nkotɔsrɛ.

²Na wabrɛ n’aso ase ama me, enti mete ase yi, mɛbɔ ne din.

³ Owu nhama kyekyeree me, na asaman ahohia too me, mihuu ahoguan ne awerɛhow

⁴Na AWURADE din na mebɔe sɛ: O! AWURADE, gye me kra.

⁵Ɔdomfo ne ɔtreneeni ne AWURADE, Yiw yɛn Nyankopɔn yɛ mmɔborohunufo.

⁶AWURADE hwɛ ayemfo, miguroe, na ogyee me nkwa.

⁷ Me kra, san kɔ wo home mu, na AWURADE ne wo adi no yiye.

⁸Na woayi me kra afi wu mu, m’aniwa afi nusu mu, ne me nan afi asehwe mu.

⁹ Mɛnantew AWURADE anim, ateasefo asase so.

¹⁰ Magye madi, mpo bere a mekae sɛ: Me de, meyɛ mmɔbɔ sɛ!

¹¹ Mekae m’abotu mu sɛ: Nnipa nyinaa yɛ atorofo.

¹²Dɛn na mede mɛhyɛ AWURADE anan mu, ne yiye a ɔyɛ me nyinaa ho?

¹³Mɛma nkwagye kuruwa so, na mabɔ AWURADE din.

¹⁴ Mede m’aboade mɛma AWURADE, ne man nyinaa anim.

¹⁵ AWURADE ahotefo wu de, ɛbo yɛ den n’anim.

¹⁶O! AWURADE, meyɛ w’akoa, meyɛ w’akoa, w’afenaa ba, woasan me nhama.

¹⁷Wo na mɛbɔ wo aseda afɔre, na mabɔ AWURADE din.

¹⁸Mede m’aboade mɛma AWURADE, ne man nyinaa anim,

¹⁹AWURADE fi adiwo, wo, Yerusalem, mfinimfini. Munyi AWURADE ayɛ!