Read Revised Akuapem Twi DC-KYERƐW KRONKRON Nnwom 119 Bible Online

Nnwom 119 - Revised Akuapem Twi DC-KYERƐW KRONKRON bible

Nnwom 119

¹ Nhyira ne wɔn a wɔn kwan yɛ pɛ, na wɔnam AWURADE mmara so.

²Nhyira ne wɔn a wɔhwɛ n’adansesɛm so, na wɔde wɔn koma nyinaa di akyi,

³nso wɔnyɛ amumɔyɛde, na wɔnam n’akwan so.

⁴Wo na wode wo nsiesiei ahyɛ yɛn sɛ yenni so koraa.

⁵O, sɛ wɔateɛteɛ m’akwan, na midi w’ahyɛde so ɛ!

⁶Sɛ mehwɛ wo mmara nsɛm nyinaa a, ɛnne anka m’ani renwu.

⁷Mede koma a ɛteɛ mɛda wo ase sɛ meresua wo trenee atemmude no.

⁸Medi w’ahyɛde so, nnyaw me korakora.

⁹Ɛdɛn na aberante de bɛtew ne kwan ho? Ɛne sɛ ɔhwɛ ne ho so sɛnea wo nsɛm se.

¹⁰Mede me koma nyinaa midi w’akyi, mma mimmfi wo mmara nsɛm ho minnkyin.

¹¹Mede wo nsɛm makora me komam, na manyɛ wo ho bɔne bi.

¹² Nhyira ne wo, AWURADE, kyerɛkyerɛ me w’ahyɛde.

¹³Mede m’ano maka w’anom atemmu nyinaa.

¹⁴W’adansesɛm kwan mu na m’ani gye, sɛnea egye ahonyade bi ho.

¹⁵Meredwen wo nsiesiei ho, na merehwɛ w’akwan.

¹⁶ W’ahyɛde ho na me ho sɛpɛw me, me werɛ remfi wo nsɛm.

¹⁷Yɛ w’akoa yiye, na minnya nkwa, na madi wo nsɛm so.

¹⁸Bue m’aniwa, na menhwɛ wo mmara mu anwonwade.

¹⁹ Meyɛ ɔhɔho asase so, mfa wo mmara nsɛm nhintaw me.

²⁰Me kra posaw daa nyinaa, w’atemmu ho anigyina mu.

²¹ Woateɛteɛ ahantanfo a wɔadome wɔn a wɔfom fi wo mmara nsɛm ho no.

²²Yi ahohora ne aniwu fi me so, na madi w’adansesɛm so.

²³Aman mpanyin nso tena ase keka me ho nsɛm a, w’akoa bedwen w’ahyɛde ho.

²⁴ W’adansesɛm yɛ m’adɔde ara, na ɛyɛ m’agyinatufo.

²⁵Me kra aka fam, ma minnya nkwa, sɛ w’asɛm te.

²⁶Maka m’akwan makyerɛ, na woagye me so, ma minsua w’ahyɛde.

²⁷Ma minhu wo nsiesiei kwan mu, na minnwen w’anwonwade ho.

²⁸Awerɛhow ama me kra anan, ma me so, sɛ w’asɛm te.

²⁹Yi atoro kwan fi me ho, na fa wo mmara dom me.

³⁰Mafa nokwaredi kwan, mede w’atemmude magu m’anim.

³¹Matim w’adansesɛm mu, AWURADE, mma m’ani nnwu.

³²Mitu wo mmara nsɛm kwan so mmirika, na wotrɛw me komam.

³³AWURADE, kyerɛ me w’ahyɛde kwan, na mafa so makosi ase.

³⁴Ma minhu mu, na madi wo mmara so, na mede me koma nyinaa medi so.

³⁵ Ma memfa wo mmara nsɛm kwan so, na ɛno na ɛsɔ m’ani.

³⁶Kom me koma kɔ w’adansesɛm so, na ɛnyɛ sikanibere so.

³⁷Ma m’ani ntwa adehunu hwɛ ho, ma minnya wo kwan mu nkwa.

³⁸Hyɛ w’asɛm mu den ma w’akoa a ɔde ne ho ama wo suro.

³⁹Ma m’ahohora a ɛyɛ me hu ntwa me ho, na w’atemmude ye.

⁴⁰Hwɛ, mafe wo nsiesiei, ma minnya wo trenee mu nkwa.

⁴¹AWURADE, ma w’adɔe mmra mma me, ne wo nkwagye, sɛ w’asɛm te.

⁴²Na manya asɛm bi mabua nea ɔbɔ me ahohora, na mede me ho meto w’asɛm so.

⁴³Na nyi nokwasɛm no mfi m’anom koraa, na w’atemmude so na m’ani da.

⁴⁴Na medi wo mmara so ara daa yi akosi daa ne daapem,

⁴⁵na mɛnantew tatraa mu, na midi wo nsiesiei akyi.

⁴⁶ Na mɛka w’adanse ho asɛm, ahene anim, na m’ani renwu.

⁴⁷ Na me ho bɛsɛpɛw me wo mmara nsɛm ho, na ɛno na madɔ no,

⁴⁸na mɛma me nsa so wo mmara nsɛm a madɔ no ho, na madwen w’ahyɛde ho.

⁴⁹Kae asɛm a woka kyerɛɛ w’akoa no, efisɛ woma mede m’ani metoo so.

⁵⁰ Eyi ne m’awerɛkyekye m’amanehunu mu, efisɛ w’asɛm ma minya nkwa.

⁵¹Ahantanfo di me ho fɛw pii, nanso mennan mimfii wo mmara ho ɛ.

⁵²AWURADE, mekae w’atemmu a efi teteete no, na mekyekye me werɛ.

⁵³Abufuhyew hyɛ me so, abɔnefo a wogyaw wo mmara no nti.

⁵⁴W’ahyɛde adan me nnwom, me hɔhoyɛ fi mu.

⁵⁵AWURADE, mekae wo din anadwo, na midi wo mmara so.

⁵⁶Eyi ayɛ me ade, sɛ mikura wo nsiesiei mu ara.

⁵⁷AWURADE, me kyɛfa ne wo, maka sɛ medi wo nsɛm so.

⁵⁸Mede me koma nyinaa masrɛ wo: Dom me sɛnea w’asɛm te.

⁵⁹Meda midwen m’akwan ho, na medan me nan mekyerɛ w’adansesɛm.

⁶⁰Mayɛ ntɛm, na mentwentwɛn me nan ase, sɛ medi wo mmara nsɛm so.

⁶¹ Sɛ Abɔnefo nhama abobare me ho mpo a, nanso me werɛ mfii wo mmara ɛ.

⁶² Mesɔre ɔdasum meda wo ase, wo trenee atemmude ho.

⁶³Meyɛ wɔn a wosuro wo nyinaa adamfo ɛne wɔn a wodi wo nsiesiei so.

⁶⁴ AWURADE, w’adɔe ahyɛ asase ma, ma minsua w’ahyɛde.

⁶⁵ Wo ne w’akoa adi no yiye, AWURADE, sɛ w’asɛm te.

⁶⁶Kyerɛkyerɛ me nhumu pa ne nimdeɛ, na magye wo mmara nsɛm madi.

⁶⁷ Wonnya mmrɛɛ me ase no, mefomee, na afei midi w’asɛm so.

⁶⁸ Wuye, na woyɛ yiye, kyerɛkyerɛ me w’ahyɛde.

⁶⁹ Ahantanfo atoatoa atoro ato me so, me de, mede me koma nyinaa miso wo nsiesiei mu.

⁷⁰ Wɔn koma apirim wo mmara ho sɛ srade a ada, me de, wo mmara ho na me ho sɛpɛw me.

⁷¹ Eye ma me sɛ wobrɛɛ me ase, na ama masua w’ahyɛde.

⁷² W’anom mmara ye ma me sen sika ne dwetɛ mpem.

⁷³Wo nsa na ɛyɛɛ me na esiesiee me, ma me nhumu, na minsua wo mmara nsɛm.

⁷⁴Wɔn a wosuro wo behu me na wɔn ani agye, na w’asɛm so na m’ani da.

⁷⁵ AWURADE, mahu sɛ w’atemmu yɛ trenee, na wode nokwaredi abrɛ me ase.

⁷⁶ Ma w’adɔe nyɛ me awerɛkyekye ɛ, sɛnea wokaa w’akoa no.

⁷⁷ Ma wo mmɔborohunu mmra me so, na minnya nkwa, na wo mmara ne m’anika.

⁷⁸ Ma ahantanfo ani nwu sɛ wɔbrɛɛ me ase nkontompo so. Me de, medwen wo nsiesiei ho.

⁷⁹Ma wɔn a wosuro wo nnan mmra me nkyɛn, ne wɔn a wonim w’adansesɛm no.

⁸⁰Ma me koma nyɛ pɛ, w’ahyɛde mu, na m’anim angu ase.

⁸¹Me kra tɔ wo nkwagye ho piti, w’asɛm so na m’ani da.

⁸²W’asɛm nti m’ani ayɛ siamoo. Mise: Da bɛn na wobɛkyekye me werɛ?

⁸³ Na mayɛ sɛ toa a ɛwɔ wusiw mu, nanso me werɛ mfi w’ahyɛde.

⁸⁴W’akoa nna si ahe? Da bɛn na wubebu wɔn a wɔtaa me atɛn?

⁸⁵ Ahantanfo atutu amoa ama me, wɔn a wɔnte sɛnea wo mmara kyerɛ.

⁸⁶Wo mmara nsɛm nyinaa yɛ nokware. Wɔtaa me nkontompo so, boa me!

⁸⁷Ate kumaa na wɔahyew me awie asase so, na me de, minnyaw wo nsiesiei.

⁸⁸ W’adɔe nti ma minnya nkwa, na madi w’anom adanse so.

⁸⁹ AWURADE, w’asɛm tim hɔ daa, wɔ ɔsoro.

⁹⁰Wo nokwaredi wɔ hɔ ma awo ntoatoaso nyinaa, woasiesie asase, na egyina hɔ.

⁹¹Egyina hɔ nnɛ sɛnea w’ahyɛde te, na nneɛma nyinaa yɛ w’asomfo.

⁹² Sɛ wo mmara anyɛ m’adɔde a, anka masɛe m’amane mu.

⁹³ Me werɛ remfi wo nsiesiei ara da, na ɛno so na wonam ma minya nkwa.

⁹⁴ Meyɛ wo dea, gye me nkwa, na midi wo nsiesiei akyi.

⁹⁵Abɔnefo tɛw me asɛe me. Me de, m’ani ku w’adansesɛm ho.

⁹⁶Mahu pɛyɛ nyinaa awiei, na wo mmara nsɛm trɛw pii.

⁹⁷ Medɔ wo mmara dɛn ara! Ɛne m’adwene daa adesae.

⁹⁸ Wo mmara nsɛm ayɛ me onyansafo asen m’atamfo, na ɛwɔ me daa.

⁹⁹Mewɔ nimdeɛ mesen m’akyerɛkyerɛfo nyinaa, na w’adansesɛm ne m’adwene.

¹⁰⁰Mihu ade mu mesen mpanyimfo, na mehwɛ wo nsiesiei midi so.

¹⁰¹Misianka me nan mifi kwammɔne nyinaa so, na madi w’asɛm so.

¹⁰²Memman mimfii w’atemmu ho ɛ, na wo na woakyerɛkyerɛ me.

¹⁰³ Wo nsɛm yɛ me dodom dɛ dɛn ara! Ɛsen sɛ ɛwo hyɛ m’anom.

¹⁰⁴Wo nsiesiei mu na minya nhumu, enti mikyi nkontompo kwan nyinaa.

¹⁰⁵ W’asɛm yɛ me nan ase kanea, ne me kwan so hann.

¹⁰⁶Maka ntam, na mɛma agyina, sɛ medi wo trenee atemmude so.

¹⁰⁷ Wɔabrɛ me ase dodo, AWURADE, ma minnya nkwa, sɛ w’asɛm te.

¹⁰⁸ AWURADE, ma w’ani nsɔ m’anom ayamye afɔre ɛ, na ma minsua w’atemmude.

¹⁰⁹ Me kra da me nsam daa, nanso me werɛ mfi wo mmara.

¹¹⁰Abɔnefo asum me afiri, nanso memfom wo nsiesiei kwan ho ɛ.

¹¹¹Mafa w’adansesɛm mayɛ m’agyapade daa, na ɛno na ɛma me koma ani gye.

¹¹²Makom me koma sɛ mɛyɛ w’ahyɛde daa makosi ase.

¹¹³ Mikyi adwene ntantafo, na medɔ wo mmara.

¹¹⁴ Me guankɔbea ne me kyɛm ne wo, m’ani da w’asɛm so.

¹¹⁵Nnebɔneyɛfo, mumfi me so, na madi me Nyankopɔn mmara nsɛm so.

¹¹⁶Wowaw me, sɛ w’asɛm te, na manya nkwa, na mma m’ani nnwu, me kwanhwɛ mu.

¹¹⁷So me mu, na manya nkwagye, na mahwɛ w’ahyɛde no daa.

¹¹⁸Wubu wɔn a wɔfom w’ahyɛde so nyinaa animtiaa; efisɛ nkontompo nko ne wɔn nsisi.

¹¹⁹Wuyi asase so abɔnefo nyinaa hɔ sɛ afide, enti na medɔ w’adansesɛm.

¹²⁰Wo ho hu ma me honam popo, na misuro w’atemmude.

¹²¹Mayɛ atemmude ne treneede, nnyaw me mma wɔn a wɔhyɛ me so.

¹²² Di agyinam pa ma w’akoa, mma ahantanfo nnni me amim.

¹²³M’ani ayɛ siamoo repɛ wo nkwagye ne wo trenee asɛm no.

¹²⁴Wo ne w’akoa nni no sɛ w’adɔe te, na ma minsua w’ahyɛde.

¹²⁵W’akoa ne me, ma me nhumu, na minhu w’adansesɛm.

¹²⁶Bere adu sɛ AWURADE yɛ biribi, efisɛ wɔatu wo mmara agu.

¹²⁷ Enti medɔ wo mmara nsɛm sen sika kɔkɔɔ ne amapa.

¹²⁸Enti mibu ade nyinaa mu nsiesiei nyinaa sɛ ɛteɛ, metan nkontompo kwan nyinaa.

¹²⁹W’adansesɛm yɛ nwonwa, enti na me kra di so.

¹³⁰ Wo nsɛm mu bue ma hann, ɛma nkwasea hu nyansa.

¹³¹Mibue m’anom haa mepere, efisɛ m’ani gyinaa wo mmara nsɛm.

¹³²Dan w’ani kyerɛ me, na dom me, sɛ woyɛ ma wɔn a wɔdɔ wo din no.

¹³³ Ma m’anammɔn ntim w’asɛm mu, na mma amumɔyɛ biara nnni me so.

¹³⁴Yi me fi onipa nhyɛso mu, na minni wo nsiesiei so.

¹³⁵Ma w’anim nharan w’akoa so, na ma minsua w’ahyɛde.

¹³⁶Asuten sen m’aniwa mu gu, efisɛ nnipa nni wo mmara so.

¹³⁷Ɔtreneeni ne wo, AWURADE, na w’atemmude nso teɛ.

¹³⁸Woahyɛ w’adansesɛm, trenee mu ne nokwaredi kɛse mu.

¹³⁹ Me mmɔdemmɔ redɛw sɛ gya, efisɛ m’ahohiafo werɛ afi wo nsɛm.

¹⁴⁰W’asɛm yɛ gyenennyenen pii, na w’akoa dɔ no.

¹⁴¹ Misua, na memfra, nanso me werɛ mfi wo nsiesiei.

¹⁴²Wo trenee yɛ daa trenee, na wo mmara yɛ nokware.

¹⁴³ Ahohia ne ahoyeraw ato me, nanso wo mmara nsɛm ne m’adɔde.

¹⁴⁴W’adansesɛm yɛ trenee daa, ma me nhumu, na minnya nkwa.

¹⁴⁵Mede me koma nyinaa misu mefrɛ: Gye me so. AWURADE, medi w’ahyɛde so.

¹⁴⁶Misu mefrɛ wo: Begye me, na madi w’adansesɛm so.

¹⁴⁷ Mitua ahema meteɛm, m’ani da w’asɛm so.

¹⁴⁸M’aniwa di adasu kan sɛ medwen w’asɛm ho.

¹⁴⁹ Tie me sɛ w’adɔe te. AWURADE, ma minnya nkwa sɛ w’atemmude te.

¹⁵⁰Wɔn a wodi mmusu akyi twiw bɛn, wɔne wo mmara ntam ware.

¹⁵¹ AWURADE, wo nso wobɛn, na wo mmara nsɛm nyinaa yɛ nokware.

¹⁵²Mihuu w’adansesɛm mu akyɛ, sɛ woama atim sɛ ensi hɔ daa.

¹⁵³ Hwɛ m’amanehunu, na yi me, na me werɛ mfi wo mmara.

¹⁵⁴Di m’asɛm ma me, na gye me, ma minnya nkwa, sɛ w’asɛm te.

¹⁵⁵Abɔnefo ne nkwagye ntam ware, na wɔnhwehwɛ w’ahyɛde akyi kwan.

¹⁵⁶Wo mmɔborohunu dɔɔso, AWURADE, ma minnya nkwa, sɛ w’atemmude te.

¹⁵⁷M’ataafo ne m’ahohiafo dɔɔso, nanso mintwiw mimfii w’adansesɛm ho ɛ.

¹⁵⁸Mihu akyipafo nkontompofo a, wɔn ho yɛ me nwini, sɛ wonni w’asɛm so.

¹⁵⁹Hwɛ sɛ medɔ wo nsiesiei, AWURADE, ma minnya nkwa, sɛ w’adɔe te.

¹⁶⁰ W’asɛm ntoano yɛ nokware, na wo trenee atemmu nyinaa wɔ hɔ daa.

¹⁶¹Aman mpanyin tiw me kwa, nanso w’asɛm nko na misuro.

¹⁶²M’ani ka w’asɛm ho sɛ nea wanya asade pii.

¹⁶³Metan atoro, na mikyi, wo mmara na medɔ.

¹⁶⁴Da koro miyi wo ayɛ mpɛn asɔn, wo trenee atemmu ho.

¹⁶⁵Asomdwoe pii wɔ wɔn a wɔdɔ wo mmara, na biribi ntoatoa wɔn.

¹⁶⁶ Mehwɛ wo nkwagye kwan, AWURADE, na madi wo mmara nsɛm so.

¹⁶⁷Me kra di w’adansesɛm so, na medɔ no kɛse.

¹⁶⁸ Midi wo nsiesiei ne w’adansesɛm so, na m’akwan nyinaa wɔ w’anim.

¹⁶⁹AWURADE, ma me nteɛm nnu w’anim, ma me nhumu, sɛ w’asɛm te.

¹⁷⁰Ma me nkotɔsrɛ mmra w’anim, gye me, sɛ w’asɛm te.

¹⁷¹M’ano bɛworo w’ayeyi, sɛ wokyerɛkyerɛ me w’ahyɛde.

¹⁷² Me tɛkrɛma begye w’asɛm so, na wo mmara nsɛm nyinaa yɛ trenee.

¹⁷³Ma wo nsa mmɛboa me, na wo nsiesiei na mapaw.

¹⁷⁴ Mefe wo nkwagye, AWURADE, na wo mmara ne m’adɔde.

¹⁷⁵Ma me kra ntena ase nyi wo ayɛ, na w’atemmu mmoa me.

¹⁷⁶ Mafom kwan sɛ oguan a wayera, hwehwɛ w’akoa, na me werɛ mfi wo mmara nsɛm.