Read Revised Akuapem Twi DC-KYERƐW KRONKRON Nnwom 13 Bible Online

Nnwom 13 - Revised Akuapem Twi DC-KYERƐW KRONKRON bible

Nnwom 13

¹Wɔde ma dwonkyerɛfo. Dawid dwom Ao! AWURADE, enkosi da bɛn? Wo were befi me daa? Wode w’ani behintaw me akosi da bɛn?

²Enkosi da bɛn na minni me kra mu yaw, na ade kye a, awerɛhow ntena me komam? Me tamfo nhoran me so nkosi da bɛn?

³Hwɛ na gye me so, AWURADE, me Nyankopɔn, tew m’ani, na manna owu nna,

⁴na me tamfo anka sɛ: Matumi no, na sɛ mihim a, m’ahohiahiafo anni ahurusi.

⁵Na me de, m’ani da w’adɔe so, me koma bedi wo nkwagye mu ahurusi,

⁶ mɛto AWURADE dwom sɛ ɔne me adi no yiye.