Read Revised Akuapem Twi DC-KYERƐW KRONKRON Nnwom 148 Bible Online

Nnwom 148 - Revised Akuapem Twi DC-KYERƐW KRONKRON bible

Nnwom 148

¹Munyi AWURADE ayɛ! Munyi AWURADE ayɛ mfi soro, munyi no ayɛ ɔsorosoro.

² N’abɔfo nyinaa, munyi no ayɛ, n’asafo nyinaa, munyi no ayɛ.

³Owia ne ɔsram, munyi no ayɛ, nsoromma a ɛharan nyinaa, munyi no ayɛ.

⁴Mo soro mu soro, munyi no ayɛ, ɛne mo asuasu a ɛwɔ ɔsoro so.

⁵ Ma wonyi AWURADE din ayɛ, na ɔno na ɔhyɛe na wɔbɔɔ wɔn;

⁶na ɔde wɔn tintim hɔ daa daa, wahyɛ ahyɛde a obi ntra.

⁷Munyi AWURADE ayɛ mfi asase so, nsuboa ahorow ne abun nyinaa.

⁸Ogya ne amparuwbo, sukyerɛma ne huruhurow, ahum a ɛyɛ nea n’asɛm se:

⁹Mmepɔw ne nkoko nyinaa, nnua a ɛsow ne nkyeneduru nyinaa,

¹⁰wuram mmoa ne afieboa nyinaa, mmoa a wɔwea ne ntakraboa.

¹¹Asase so ahene ne aman nyinaa, atitiriw ne asase so akannifo nyinaa,

¹²mmerante ne mmabaa nso, mpanyin ne mmofra:

¹³Wonyi AWURADE din ayɛ, sɛ ne din nko na ɛso, n’anuonyam tra asase ne ɔsoro so.

¹⁴ Na wama abɛn so ama ne man, ama n’ahotefo nyinaa ayeyi, ama Israel mma, ɔman a wɔbɛn no no. Munyi AWURADE ayɛ!