Read Revised Akuapem Twi DC-KYERƐW KRONKRON Nnwom 17 Bible Online

Nnwom 17 - Revised Akuapem Twi DC-KYERƐW KRONKRON bible

Nnwom 17

¹Dawid mpaebɔ AWURADE, tie asɛntrenee, wɛn w’aso ma me nkɔmmɔ, yɛ aso ma me mpaebɔ a emfi nnaadaa anofafa mu.

² Ma me bembu mfi w’anim mmra, ma w’aniwa nhwɛ ade a ɛteɛ.

³ Sɛ wosɔ me koma hwɛ na wohwehwɛ mu anadwo, na wonan me yiyi mu, a worenhu me mu bɔne bi. Mabɔ me tirim sɛ meremma asɛmmɔne mfi m’ano.

⁴Nnipa nneyɛe fam, w’anom asɛm no nti masɔre me ho, awerɛmfo akwan ho.

⁵W’anammɔn no ara so na me kwan nam, m’anan anwatiri.

⁶O! Onyame, Misu mefrɛ wo na wubegye me so, Yɛ aso ma me, tie me nsɛm.

⁷ Fa anwonwa kwan so yi wo dɔ mmapa no adi kyerɛ, wo a wugye wɔn a wɔhwehwɛ guankɔbea, fi wɔn atamfo nsam.

⁸ Hwɛ me so sɛ aniwa kurutiayisi, fa me hintaw wo ntaban nwini ase,

⁹abɔnefo a wɔfom me fa, m’atamfo atirimɔdenfo a wotwa me ho hyia no nti.

¹⁰Wɔapirim wɔn koma, wonni mmɔborohunu biara, wɔde wɔn ano ka ahantan kasa.

¹¹Wɔtetɛw me, pɛ me asehwe na afei wotwa me ho hyia, wɔde wɔn ani akari me, pɛ sɛ mehwe ase.

¹² Wɔte sɛ gyata a ɔredɛɛdɛɛ apɛ nea obenya no akyere te sɛ gyata ba a ɔtɛw kokoam.

¹³O! AWURADE, sɔre besianka wɔn, brɛ wɔn ase, fa w’afoa gye me kra fi ɔbɔnefo nsam.

¹⁴ AWURADE, fa wo nsa begye me, fi nnipa nsam, nnipa a wɔn nkwa kyɛfa ne wiase de, fa nea wasiesie ama wɔn hyɛ wɔn yafunu ma ma wɔn mma nnya no mmoroso na wɔmfa bi nnyaw nkyirimma.

¹⁵Me de, mɛhwɛ w’anim trenee mu; minyan a, mehu sɛ mahu wo.