Read Revised Akuapem Twi DC-KYERƐW KRONKRON Nnwom 19 Bible Online

Nnwom 19 - Revised Akuapem Twi DC-KYERƐW KRONKRON bible

Nnwom 19

¹Wɔde ma dwonkyerɛfo. Dawid dwom Ɔsoro ka Onyankopɔn anuonyam, na ewim kyerɛ ne nsa ano adwuma.

²Da koro biara woro kyerɛ, na anadwo biara da nimdeɛ adi.

³Ɛnyɛ ɔkasa, na ɛnyɛ nsɛm a wɔnte,

⁴ Ɔsoro susuhama du, asase nyinaa so na ne nsɛm du wiase ano; wasi ntamadan ama owia ɔsoro hɔ.

⁵Na ofi adi sɛ ayeforokunu a ofi ne pia mu, ɛde ahosɛpɛw tu mmirika sɛ ɔbran.

⁶ N’adifi wɔ ɔsoro ano, na ne kyini kodu ano hɔ, na biribiara nkora ne ho mfi ne hyew ano.

⁷ AWURADE mmara yɛ pɛ, edwudwo ɔkra. AWURADE adanse atim, ɛma awiɛmfo hu nyansa.

⁸ AWURADE ahyɛde teɛ, ɛma koma tɔ yam, AWURADE mmarahyɛ ho tew, na ɛtew ani.

⁹AWURADE suro yɛ kronkron, egyina hɔ daa. AWURADE atemmude yɛ nokware, ne nyinaa teɛ.

¹⁰ Ɛyɛ akɔnnɔ sen sika ne amapa pii, na ɛyɛ fremfrem sen ɛwo ne ahwerew mu nsu.

¹¹Wɔnam so bɔ w'akoa kɔkɔ, ɛsodi mu wɔ akatua pii.

¹² Hena na ohu n’ankasa ne mfomso mu? Me bɔne a ahintaw me, fa kyɛ me.

¹³ Nso bɔ w’akoa ho ban wɔ bɔne ho, na anhyɛ me so. Ɛno na medi bem, na me ho afi amumɔyɛ kɛse ho.

¹⁴Ma m’anom nsɛm nyɛ wo fɛ, na me komam nkɔmmɔ nsɔ w’ani, AWURADE, me botan ne me gyefo.