Read Revised Akuapem Twi DC-KYERƐW KRONKRON Nnwom 21 Bible Online

Nnwom 21 - Revised Akuapem Twi DC-KYERƐW KRONKRON bible

Nnwom 21

¹Wɔde ma dwonkyerɛfo. Dawid dwom Ao, AWURADE, ɔhene ani gye w’ahoɔden mu, na wo nkwagye nti hwɛ sɛnea ne ho sɛpɛw no fa.

² Nea ne koma pɛ na wode ama no, na nea n’ano bisae no, woankame no.

³ Na wode papa mu nhyira hyia no, wode sika kɔkɔɔ abɔ no abotiri.

⁴Obisaa wo hɔ nkwa, wode ama no, nna a ɛware daa daa.

⁵N’anuonyam so wo nkwagye nti, kɛseyɛ ne nidi na wode ama no.

⁶Yiw wode no asi hɔ sɛ nhyira nko ara daa, wode w’anim anigye ama ne ho asɛpɛw no.

⁷Efisɛ ɔhene ani da AWURADE so, na nea ɔwɔ sorosoro adɔe nti ɔrenhinhim.

⁸Wo nsa nifa bɛka w’atamfo nyinaa, wo nifa benya wɔn a wokyi wo.

⁹Wubeyi wo ho adi ayɛ wɔn sɛ ogya fononoo, AWURADE de n’abufuw bɛmene wɔn, na ogya ahyew wɔn.

¹⁰ Wobɛsɛe wɔn aba afi asase so, ne wɔn asefo afi nnipa mma mu.

¹¹ Sɛ wɔbɔ wo ho pɔw bɔne na wosusuw bɔne bi ho a, wɔrentumi nyɛ.

¹² Na wobɛma wɔasan wɔn akyi, wode wo bɛmma bɛkyerɛ wɔn anim.

¹³AWURADE, ma wo ho so w’ahoɔden mu, yɛde dwonto ne sanku bɛkamfo wo mmaninne.