Read Revised Akuapem Twi DC-KYERƐW KRONKRON Nnwom 28 Bible Online

Nnwom 28 - Revised Akuapem Twi DC-KYERƐW KRONKRON bible

Nnwom 28

¹Dawid de AWURADE, wo na misu mefrɛ wo, me botan, mmua w’ano wɔ me ho; anyɛ saa na wumua w’ano wɔ me ho a, mɛyɛ sɛ wɔn a wosian kɔ Amoa mu no.

² Sɛ misu mefrɛ wo, na mema me nsa so mekyerɛ wo tenabea kronkron hɔ a, tie me nkotɔsrɛ.

³ Nyi me afrɛ so mfra abɔnefo ne abusuyɛfo a wɔne wɔn yɔnkonom kasa asomdwoe so, na wɔn komam de, bɔne wɔ mu.

⁴Yɛ wɔn sɛ wɔn nneyɛe ne wɔn abrabɔ bɔne te, susuw wɔn nsa ano nnwuma so ma wɔn, tua wɔn nea wɔayɛ so ka.

⁵ Efisɛ wɔn ani nni AWURADE nneyɛe ne ne nsa ano nnwuma so: Obedwiriw wɔn, na ɔrento wɔn nsi hɔ.

⁶Ayeyi nka AWURADE, efisɛ watie me nkotɔsrɛ.

⁷ AWURADE ne m’ahoɔden ne me kyɛm. Mede me koma mato no so, na waboa me, enti me koma ho asan no, na mede me dwom meda no ase.

⁸AWURADE ne nkurɔfo ahoɔden, nea wasra no no nkwagye aban ne no.

⁹ Boa wo man, na hyira w’apɛgyade, na yɛn wɔn, na ma wɔn so daa.