Read Revised Akuapem Twi DC-KYERƐW KRONKRON Nnwom 29 Bible Online

Nnwom 29 - Revised Akuapem Twi DC-KYERƐW KRONKRON bible

Nnwom 29

¹Dawid dwom Mo ɔsoro asafo, momfa anuonyam mma AWURADE, momfa anuonyam ne tumi mma AWURADE.

² Yiw, monhyɛ AWURADE din anuonyam, monsɔre AWURADE, ahokeka kronkron mu.

³ AWURADE nne wɔ asu so, anuonyam Nyankopɔn ma aprannaa bom, AWURADE wɔ nsu bebree so.

⁴AWURADE nne mu yɛ den sɛ, AWURADE nne mu wɔ anuonyam.

⁵AWURADE nne bubu nkyeneduru, AWURADE abubu Lebanon nkyeneduru.

⁶ Na ɔma wohuruhuruw sɛ nantwi ba, Lebanon ne Sirion sɛ kooforo.

⁷AWURADE nne pa gya a ɛdɛw.

⁸AWURADE nne ma sare so hɔ him, AWURADE ma Kades sare so hɔ po.

⁹AWURADE nne ma aforote ko awo, na ɛma kwae mu da hɔ, na n’asɔrefi mufo nyinaa ka sɛ: Anuonyam nka Nyankopɔn.

¹⁰AWURADE tenaa nsu a ayiri so, na AWURADE bɛtena hɔ sɛ ɔhene daa.

¹¹ AWURADE bɛma ne man ahoɔden, AWURADE de asomdwoe behyira ne man.