Read Revised Akuapem Twi DC-KYERƐW KRONKRON Nnwom 31 Bible Online

Nnwom 31 - Revised Akuapem Twi DC-KYERƐW KRONKRON bible

Nnwom 31

¹Wɔde ma dwonkyerɛfo. Dawid dwom Wo, AWURADE, na maguan matoa wo, mma m’anim nngu ase da biara da. Fa wo trenee so gye me,

² yɛ aso ma me, yɛ ntɛm gye me. Yɛ me guankɔbea botan, ne srɔnsrɔn so aban sɛ wubegye me nkwa.

³ Na wone me botantim ne me tenabea srɔnsrɔn, na wo din nti wobɛkyerɛ me kwan na woakogya me.

⁴ Wubeyi me afi afiri a wɔahintaw asum me no mu, na wo ara ne m’aban a ɛyɛ den.

⁵ Wo nsam na mede me honhom mehyɛ; AWURADE, nokware Nyankopɔn, woagye me.

⁶Metan wɔn a wodi atoro ahuhude akyi, na me de, mebata AWURADE ho.

⁷Medi ahurusi, na m’ani agye w’adɔe ho, sɛ woahwɛ m’amanehunu, na woahu me kra ahohia.

⁸ Na woanyi me anhyɛ ɔtamfo nsa, wode m’anan agyina nea ɛtrɛw.

⁹ AWURADE, hu me mmɔbɔ, na me ho hia me. Awerɛhow ama m’aniwa ne me kra ne me honam atwintwam.

¹⁰Na me nkwa ahwere ɛyaw mu, na me mfe ahwere ahomegu mu. M’amumɔyɛ nti m’ahoɔden so ahuan, na me nnompe agurow.

¹¹ M’ahohiahiafo nyinaa nti mayɛ ɔhohorafo, na mayɛ me ho tefo so duru, na m’amannifo suro me, wɔn a mifi adi a wohu me guan me.

¹²Nnipa werɛ afi me sɛ owufo, mayɛ sɛ ade a wɔtow kyene.

¹³ Na mete nnipa bebree nsekudi, ahude atwa me ho ahyia, sɛ me ho agyina a wɔakɔ no mu wɔabɔ wɔn tirim sɛ wɔbɛsɛe me kra.

¹⁴Na me de, wo, AWURADE, so na mede me ho mato. Mise: Wone me Nyankopɔn.

¹⁵ Wo nsam na me mmere wɔ, gye me m’atamfo ne m’ataafo nsam.

¹⁶ Tew w’anim kyerɛ w’akoa, fa w’adɔe so gye me nkwa.

¹⁷AWURADE, mma m’anim nngu ase, na misu mefrɛ wo. Ma abɔnefo anim ngu ase, na wɔntotɔ mum Asamando.

¹⁸Ma atorofo ano mmua, wɔn a wɔka ɔtreneeni ho nsɛm a ɛyɛ den, ahokyerɛ ne aniammɔnho mu no.

¹⁹Wo papa a wode asie ama wɔn a wosuro wo no sɛnea esi so fa! Ɛno na wuyi kyerɛ wɔn a woguan bɛtoa wo no, nnipa anim.

²⁰ Wode w’anim bɔ wɔn ho ban de wɔn hintaw fi nnipa a wɔabɔ tukuw anim, wode wɔn sie ɔsese mu fi tɛkrɛma birebire ho.

²¹ Nhyira ne AWURADE sɛ wama n’adɔe ayɛ nwonwa ama me, kurow a ahohiahia wɔ mu.

²² Nso me de, misee m’ahoyeraw mu sɛ: Wɔatwa me afi w’ani so. Nanso misu mefrɛɛ wo no, wotee me nkotɔsrɛ.

²³Monnɔ AWURADE, mo a moyɛ n’ahotefo nyinaa. AWURADE hwɛ wɔn a wodi nokware so, na otua nea odi ahantansɛm no ka a ɛboro so.

²⁴ Monhyɛ mo ho den na mumpirim mo bo, mo a motwɛn AWURADE nyinaa.