Read Revised Akuapem Twi DC-KYERƐW KRONKRON Nnwom 34 Bible Online

Nnwom 34 - Revised Akuapem Twi DC-KYERƐW KRONKRON bible

Nnwom 34

¹Dawid de a ɔtoe bere a ɔdan sɛ ɔbɔdamfo Abimelek anim na ɔpam no ma ɔkɔe no Mehyira AWURADE nna nyinaa, n’ayeyi wɔ m’anom daa yi.

²AWURADE mu na me kra bɛhoahoa ne ho, ahobrɛasefo bɛte, na wɔn ani agye.

³Mo ne me nkamfo AWURADE kɛseyɛ, na momma yɛmmom mma ne din so.

⁴Mahwehwɛ AWURADE, na wabua me, na wagye me afi nea misuro nyinaa mu.

⁵Hwɛ no, na nya anim tew, na w’anim angu ase.

⁶Ohiani yi teɛɛm, na AWURADE tiee no, na ogyee no n’ahohia nyinaa mu.

⁷ AWURADE bɔfo bɔ wɔn a wosuro no ho nsra hyia, na ogye wɔn.

⁸ Monka nhwɛ na munhu sɛ AWURADE ye, nhyira ne onipa a oguan toa no.

⁹ AWURADE akronkronfo, munsuro no! Na biribiara remmɔ wɔn a wosuro no.

¹⁰ Gyataforo bedi hia na ɔkɔm ade wɔn, na wɔn a wɔhwehwɛ AWURADE no, ade pa biara remmɔ wɔn.

¹¹Mma, mommra, monyɛ aso mma me! Mɛkyerɛ mo AWURADE suro.

¹² Mo mu hena na ɔhwehwɛ nkwa, na ɔpɛ onyinkyɛ sɛ obehu papa?

¹³Kora wo tɛkrɛma, bɔne ho, ɛne w’ano, nnaadaasɛm ho.

¹⁴ Yi bɔne ho akwa, na yɛ papa, hwehwɛ asomdwoe, na tiw no.

¹⁵AWURADE ani wɔ treneefo so, na n’aso tie wɔn sufrɛ.

¹⁶ AWURADE ani sa nnebɔneyɛfo, sɛ obegu wɔn ase, asase so.

¹⁷Treneefo su frɛ, na AWURADE tie, na ogye wɔn fi wɔn ahohia nyinaa mu.

¹⁸ AWURADE bɛn wɔn a wɔn koma abubu, na ogye wɔn a wɔn honhom apɛtɛw.

¹⁹ Ɔtreneeni amane dɔɔso, na AWURADE gye no ne nyinaa mu.

²⁰Ɔhwɛ ne nnompe nyinaa, emu biako po mmu.

²¹Bɔne bekum ɔbɔnefo, na wɔn a wɔtan ɔtreneeni no bɛbrɛ mu.

²²AWURADE gye ne nkoa kra, na wɔn a woguan toa no nyinaa remmrɛ mu.