Read Revised Akuapem Twi DC-KYERƐW KRONKRON Nnwom 42 Bible Online

Nnwom 42 - Revised Akuapem Twi DC-KYERƐW KRONKRON bible

Nnwom 42

¹Wɔde ma dwonkyerɛfo. Kora mma nnwenho dwom Sɛ ɔforote pere hwehwɛ nsuwa no, sɛ me kra pere hwehwɛ wo, Nyankopɔn, ne no.

² Onyankopɔn, nkwa Nyankopɔn ho kɔm de me kra. Da bɛn na mɛba mabefi Nyankopɔn anim?

³ Me nusu ayɛ me aduan awia ne anadwo, sɛ wose me daa sɛ: Wo Nyankopɔn wɔ he?

⁴ Mekae eyinom, na mihwie me kra wɔ me mu, sɛnea me ne asafokuw nantew kɔɔ Onyankopɔn fi, na me ne nkurɔfo a wɔnam yuu hyɛ fa no de ayeyi ne aseda nnwom kɔe no.

⁵ Me kra, adɛn na woabotow sɛɛ, na wusi me mu apini? Fa w’ani to Nyankopɔn so, na mɛda so mayi no ayɛ, sɛ ɔyɛ m’anim boafo ne me Nyankopɔn.

⁶Me kra abotow wɔ me mu, enti mekae wo, Yordan ne Hermon mmepɔw asase so, Misar bepɔw so.

⁷ Ebun frɛ ebun, wo nsu a ɛworo gugu no gyegyeegye no mu, w’asorɔkye ne w’aworo nyinaa abu afa me so.

⁸Adekyee, AWURADE beyi n’adɔe adi, na anadwo mato no dwom mabɔ mpae ama me nkwa Nyankopɔn.

⁹ Mɛka makyerɛ Onyankopɔn, me botan no, sɛ: Adɛn nti na wo werɛ afi me? Adɛn nti na ɔtamfo hyɛ a ɔhyɛ me so nti memfa awerɛhow mennantew?

¹⁰Ahohora a m’ahohiafo bɔ me no yɛ me sɛ me nnompe redwerɛw, sɛ daa wose me sɛ: Wo Nyankopɔn wɔ he?

¹¹ Me kra, adɛn na woabotow sɛɛ, na wusi me mu apini? Fa w’ani to Nyankopɔn so, na mɛda so mayi no ayɛ, sɛ ɔyɛ m’anim boafo ne me Nyankopɔn.