Read Revised Akuapem Twi DC-KYERƐW KRONKRON Nnwom 49 Bible Online

Nnwom 49 - Revised Akuapem Twi DC-KYERƐW KRONKRON bible

Nnwom 49

¹Wɔde ma dwonkyerɛfo. Kora mma dwom Aman nyinaa, muntie eyi, mo a mote wiase nyinaa, monyɛ aso.

²Nnipa mma mpapahwekwa oo, mmarima mma a wɔwɔ din oo, adefo ne ahiafo nyinaa.

³M’ano bɛka anyansasɛm, na me komam nsusuwii yɛ nhumu ara nko.

⁴ Mɛbrɛ m’aso ase matie abebusɛm, mede sankubɔ mɛkyerɛ me bɛ ase.

⁵Adɛn nti na minsuro nna bɔne mu, nna a m’atɛwfo amumɔyɛ twa me ho hyia mu?

⁶Wɔde wɔn ho to wɔn ahonyade so, na wɔde wɔn adedodow hoahoa wɔn ho.

⁷Onua rentumi nnye onipa da, ɔremma Onyankopɔn ne mpatade,

⁸ na wɔn kra gye bo yɛ den, na ɛma ogyaw hɔ koraa,

⁹sɛ ɔntena ase ara daa, na wanhu ɔdamoa.

¹⁰ Na ohu sɛ anyansafo wuwu, ne saa nso na nkwasea ne agyimifo sɛe, na wogyaw wɔn ahode ma ebinom.

¹¹Wɔn tirim ne sɛ wɔn adan bɛtena hɔ daa, na wɔn afi atena hɔ akosi awo ntoatoaso so; wɔde wɔn din toto wɔn nsaase.

¹² Nanso onipa a ɔwɔ nidi mu no, ɔrentena mu, ɔte sɛ mmoa a woyi wɔn hɔ.

¹³Ɔkwan a nkwasea fa so ni, na wɔn a wɔpɛ wɔn anom asɛm no di wɔn akyi. Sela

¹⁴Wɔboa asaman sɛ nguan, owu hwɛ wɔn so, na treneefo betiatia wɔn so anɔpa, na wɔn de, asaman bɛsɛe wɔn ahoɔfɛ, na wɔannya tenabea bio.

¹⁵ Na me kra de, Onyankopɔn begye no asaman nsam, na obegye me. Sela

¹⁶ Sɛ obi nya ne ho a, nsuro, sɛ ne fi anuonyam redɔɔso a, nsuro,

¹⁷ na owu a, ɔremfa emu biribiara nkɔ, n’anuonyam rensian nni n’akyi.

¹⁸ Sɛ ohyira ne kra ne nkwa bere mu, nso woyi wo ayɛ sɛ woyɛ wo ho yiye a,

¹⁹ɔbɛkɔ n’agyanom abusua mu, wɔrenhu hann ara da.

²⁰ Onipa a ɔwɔ nidi mu na onni nhumu no, ɔte sɛ mmoa a woyi wɔn hɔ.