Read Revised Akuapem Twi DC-KYERƐW KRONKRON Nnwom 5 Bible Online

Nnwom 5 - Revised Akuapem Twi DC-KYERƐW KRONKRON bible

Nnwom 5

¹Wɔde ma dwonkyerɛfo sɛ wɔmfa atɛntɛbɛn nto. Dawid dwom AWURADE, yɛ aso ma me nsɛm, hwɛ m’apinisi a mikuram.

² Tie me nteɛm, me hene ne me Nyankopɔn, na wo na mɛbɔ wo mpae.

³AWURADE, tie me nne anɔpa, anɔpa na mesiesie mama wo, na mɛhwɛ wo kwan.

⁴Na wonyɛ Onyankopɔn a wopɛ adebɔne; ɔbɔne ne wo rentena.

⁵Ahantanfo rennyina w’anim, wotan amumɔyɛfo nyinaa.

⁶Wosɛe wɔn a wɔka atosɛm; AWURADE kyi mogyapɛfo ne asisifo.

⁷ Na me de, menam wo dom bebree so mɛba wo fi. Na wo ho suro mu na mɛsɔre makyerɛ w’asɔrefi kronkron no, na makotow.

⁸AWURADE, fa wo trenee kyerɛ me kwan, wɔn a wɔtɛw me nti, teɛ wo kwan wɔ m’anim.

⁹ Na wɔn anom nni nokwasɛm bi, ɔsɛe ahyɛ wɔn koma ma, wɔn menewa yɛ ɔda a abue, na wɔde wɔn tɛkrɛma dɛfɛdɛfɛ.

¹⁰Onyankopɔn, bu wɔn fɔ, ma wɔmpɔn mfi wɔn agyinatu ho. Wɔn mmarato bebrebe nti sum wɔn gu, efisɛ wɔasɔre atia wo.

¹¹ Na ma wɔn a woguan toa wo nyinaa ani nnye, na wɔmfa ahosan nhuro daa, efisɛ woakata wɔn so, na ma wɔn a wɔdɔ wo din no ani nka wo ho.

¹² Na wo, AWURADE, wuhyira ɔtreneeni, wode anisɔ twa ne ho hyia sɛ ɔkyɛm.