Read Revised Akuapem Twi DC-KYERƐW KRONKRON Nnwom 62 Bible Online

Nnwom 62 - Revised Akuapem Twi DC-KYERƐW KRONKRON bible

Nnwom 62

¹Wɔde ma dwonkyerɛfo Yedutun. Dawid dwom Ampa, me kra yɛ komm hwɛ Onyankopɔn ara; ne nsam na minya nkwagye.

²Ampa ara, ɔne me botan ne me nkwagye, m’abankɛse, merenhim bebree bi.

³Mobɛhaw obiakofo akosi da bɛn, na mo nyinaa aburuw no sɛ ɔfasu a akyea ne ban a agow?

⁴Ampa ara, wɔatu agyina sɛ wobetu no so. Wɔpɛ atorodi, wɔde wɔn ano hyira, nanso wɔn mu de, wɔhyɛ nsew. Sela

⁵Ampa, me kra, yɛ komm hwɛ Onyankopɔn ara, na ne nsam na minya nea m’ani da so.

⁶ Ampa ara, ɔne me botan ne me nkwagye, m’abankɛse, merenhim.

⁷ Onyankopɔn nsam na me nkwagye ne m’anuonyam wɔ, me botan a ɛyɛ den, me guankɔbea ne Nyankopɔn.

⁸Nkurɔfo, momfa mo ho nto no so daa. Munyi mo yam nkyerɛ no, Onyankopɔn ne yɛn guankɔbea. Sela

⁹Ampa ara, nnipa mma yɛ ahuhuw, mmarima mma yɛ hunu; wogu nseniam a, ehuan kɔ soro, wɔn nyinaa yɛ ahuhuw.

¹⁰ Mommfa mo ho nnto amimdi so, na monnyɛ dwowtwa ho ahupoo; sɛ ahonyade dɔ a, mommfa mo koma nnto so.

¹¹Onyankopɔn akasa pɛnkoro, mprenu na mate: Sɛ tumi yɛ Onyankopɔn dea,

¹² na wo, AWURADE, na ɔdom wɔ wo. Na wubetua onipa ka sɛ n’adwuma te.