Read Revised Akuapem Twi DC-KYERƐW KRONKRON Nnwom 64 Bible Online

Nnwom 64 - Revised Akuapem Twi DC-KYERƐW KRONKRON bible

Nnwom 64

¹Wɔde ma dwonkyerɛfo. Dawid dwom Onyankopɔn, tie me nne, me nkɔmmɔdi mu, bɔ me nkwa ho ban, na ɔtamfo ammeyi me hu.

²Fa me hintaw fi nnipa bɔne kokoam agyinatu ho, fi amumɔyɛfo gyegyeegye ho.

³ Wɔn na wɔsew wɔn tɛkrɛma ano sɛ afoa, wokuntun ta mu rebɛtow wɔn mmɛmma, ɛne nsɛm fo,

⁴ sɛ wɔbɛtow abɔ nea ɔyɛ pɛ no kokoam, wɔtow bɔ mpofirim, na wonsuro.

⁵ Wɔhyɛ wɔn asɛmmɔne mu den, wɔkeka sɛ wobehintaw asum afiri, wɔka sɛ: Hena na obehu yɛn?

⁶Wɔbɔre hwehwɛ amumɔyɛ, wɔawie wɔn atirimpɔw no, wɔabɔre abɔre, efisɛ onipa tirim ne ne komam dɔ.

⁷Na Onyankopɔn bɛtow bɛmma abɔ wɔn, wobepira mpofirim,

⁸ na wɔbɛhwe ase, na wɔn tɛkrɛma so asɛm abua wɔn atifi, wɔn a wɔhwɛ wɔn nyinaa ho bɛpopo.

⁹Na nnipa nyinaa besuro, na wɔaka Onyankopɔn adwuma, na wɔahu ne nneyɛe mu.

¹⁰Ɔtreneeni ani begye AWURADE ho, na waguan atoa no, na komam teefo nyinaa bɛhyehye wɔn ho.