Read Revised Akuapem Twi DC-KYERƐW KRONKRON Nnwom 68 Bible Online

Nnwom 68 - Revised Akuapem Twi DC-KYERƐW KRONKRON bible

Nnwom 68

¹Wɔde ma dwonkyerɛfo. Dawid sanku dwom Ma Onyankopɔn nsɔre na n’atamfo nhwete, na ma wɔn a wokyi no nguan n’anim.

²Sɛ owusiw tu kɔ no, sɛ bɔ wɔn gu ara ne no; sɛ hweawa nan ogya ho no, sɛ abɔnefo bɛsɛe Onyankopɔn anim ne no.

³Na treneefo ani begye, wobedi Nyankopɔn anim ahurusi na wɔn ho asan wɔn, anigye mu.

⁴ Monto Nyankopɔn dwom, monto dwom mma ne din, monsesɛw ɔkwan mma nea ɔte ade so nam sare so reba, ne din de AWURADE, na munni n’anim ahurusi.

⁵ Nyisaa se ne akunafo sɛnnifo ne Nyankopɔn, ne tenabea kronkron mu.

⁶Onyankopɔn ma ɔhokwafo nya mpɔn ne mma, otu apokyerɛfo ma wobedi yiye, na mansotwefo de, wɔtena nkyerekyerewa so.

⁷ Onyankopɔn, wufii adi dii wo man anim, wofaa sare pradada so no, Sela

⁸ asase wosowee, ɔsoro nso sosɔe, Onyankopɔn anim, Sinai yi ara wosowee, Onyankopɔn, Israel Nyankopɔn, anim.

⁹Onyankopɔn, wotɔɔ adɔe su guu w’agyapade so, na ɛtɔ beraw a, wo na woma ɛyɛ yiye.

¹⁰W’asafo tenaa so; Onyankopɔn, w’ayamye mu wusiesie maa amanehunufo.

¹¹ AWURADE bɛka n’anom asɛm, mmea a wɔka nkonim asɛmpa no asafo so.

¹²Atamfo dɔm ahemfo beguanguan, na ɔbea a ɔte fie no akyekyɛ asade mu.

¹³ Motete nguannan ntam a, ɛte sɛ aborɔnoma ntaban a wɔde dwetɛ agu ho, ne ne ntakra a sika fɛfɛ haran ho.

¹⁴Otumfo bɔ ahemfo gu asase no so a, ɛhoa sɛ nsukyerɛma, Salmon so.

¹⁵Basan mmepɔw yɛ Onyankopɔn mmepɔw, Basan mmepɔw yɛ mmepɔw atenten.

¹⁶ Adɛn na mo mmepɔw atenten mode ani bɔne hwɛ bepɔw a Onyankopɔn pɛ sɛ ɔtena so no? Ampa, AWURADE bɛtena so daa.

¹⁷ Onyankopɔn ko teaseɛnam si mpem mpem ɔpehuhaa, AWURADE wɔ wɔn mu te sɛ Sinai kronkronbea no mu.

¹⁸ Woaforo kɔ ɔsoro, woafa nnommum nnommum, woagye nnipa mu ayɛyɛde, mansotwefo mu mpo, na AWURADE Onyankopɔn atena hɔ.

¹⁹ Nhyira ne AWURADE a ɔsoa yɛn adesoa ma yɛn daa daa, ɔno Nyankopɔn no ne yɛn nkwagye. Sela

²⁰Ɔno Nyankopɔn no ne yɛn nkwagye Nyankopɔn, na AWURADE na owu mu fi wɔ no.

²¹Ampa ara, Onyankopɔn bɛbobɔ n’atamfo ti, ɔbɛbɔ nea wasiw atimum na ɔkyea n’afodi mu no ti.

²²Na AWURADE aka sɛ: Mɛfa wɔn mafi Basan maba bio, mede wɔn mɛsan mafi po bun mu maba,

²³na wode wo nan akeka mogya mu, na w’akraman tɛkrɛma anya atamfo no ho biribi ataforo.

²⁴ Onyankopɔn, wohu w’adi a worebefi, me Nyankopɔn ne me hene adi a ɔrebefi, kronkronbea hɔ.

²⁵ Nnwontofo di kan, asankubɔfo di akyiri, mmabaa a wɔka mpintin ntam.

²⁶ Munhyira Onyankopɔn, mo asafo ahyiae mu, mo a mufi Israel abura mu, munhyira AWURADE.

²⁷Benyamin akumaa, wɔn sodifo no, wɔ hɔ; Yuda atitiriw, wɔn asafohene horow, Sebulon atitiriw ne Naftali atitiriw wɔ hɔ.

²⁸Wo Nyankopɔn ahyɛ de wo tumi ama wo; Onyankopɔn, hyɛ nea woayɛ ama yɛn yi mu den.

²⁹ W’asɔrefi a ɛwɔ Yerusalem nti ahene de ayɛyɛde bɛbrɛ wo.

³⁰Ka mmɛwa mu aboa ne anantwininikuw ne anantwi mma a ɛyɛ aman no anim, na wɔde dwetɛ mpɔw abɛsom. Pansam aman a wɔpɛ akodi mu.

³¹ Akunini fi Misraim bɛba, Etiopia bɛteɛ ne nsa ntɛm ama Onyankopɔn.

³²Asase so ahenni, monto Nyankopɔn dwom, monto dwom mma AWURADE. Sela

³³Monto mma nea ɔte tete soro mu soro no. Hwɛ, ɔma wɔte ne nne a ɛyɛ tumi nne no.

³⁴ Momfa tumi mma Onyankopɔn, n’anuonyam kata Israel so, na ne tumi wɔ wim tɔnn.

³⁵ Onyankopɔn ho yɛ hu, wo tenabea kronkron mu, Israel Nyankopɔn de tumi ne ahoɔden ma ne man. Nhyira ne Nyankopɔn.