Read Revised Akuapem Twi DC-KYERƐW KRONKRON Nnwom 78 Bible Online

Nnwom 78 - Revised Akuapem Twi DC-KYERƐW KRONKRON bible

Nnwom 78

¹Asaf nnwenho dwom Me man, monyɛ aso mma me mmara, monwɛn mo aso mma m’anom nsɛm.

² Mebue m’ano mmebu mu, meyi atetesɛm adi sɛ akasabebui.

³ Nea yɛate na wɔama yɛahu na yɛn agyanom aka akyerɛ yɛn no,

⁴yɛremfa nhintaw wɔn mma, yɛreka nkyirimma AWURADE ayeyisɛm, ne ne tumidi, ne n’anwonwade a wayɛ no.

⁵Ɔde adanse tintimii, Yakob mu, na ɔhyɛɛ mmara, Israel mu, ɛno na ɔde hyɛɛ yɛn agyanom sɛ wɔmma wɔn mma nhu,

⁶na nkyirimma, mma a wɔbɛwo wɔn no, ahu, na wosi so a, wɔaka akyerɛ wɔn mma,

⁷sɛ wɔmfa wɔn ani nto Nyankopɔn so, na wɔn werɛ mmfi Nyankopɔn nneyɛe, na wonni ne mmara nsɛm so.

⁸ Na wɔanyɛ sɛ wɔn agyanom, mma asoɔdenfo ne atuatewfo, mma a wɔmfa wɔn koma nsi tee, na wɔn honhom nni Nyankopɔn nokware.

⁹Efraim mmabanin, takurafo, bɛmmatofo, wɔdan wɔn ani koda.

¹⁰Wɔanni Nyankopɔn apam so, na ne mmara nso, wɔampɛ sɛ wɔnantew mu.

¹¹Na wɔn werɛ fii ne nneyɛe ne n’anwonwade a ɔde kyerɛɛ wɔn no.

¹² Ɔyɛɛ anwonwade wɔn agyanom anim, Misraim asase so, Soan petee mu.

¹³ Ɔpaee po mu de wɔn twaa mu, na ɔmaa nsu no gyinae sɛ kuw.

¹⁴ Ɔde mununkum gyaa wɔn awia, na anadwo nyinaa ɔde gya kanea nso gyaa wɔn.

¹⁵ Ɔpaee abotan mu sare so, na ɔma wɔnomee sɛ asukɛse.

¹⁶Ɔmaa mmasu fii ɔbotan mu bae, na ɔmaa nsu senee sɛ asuten.

¹⁷Na wɔkɔɔ so ara yɛɛ no bɔne, tew ɔsorosoroni no anim atua sare so.

¹⁸ Na wɔsɔɔ Onyankopɔn hwɛe wɔn komam, bisaa no aduan sɛnea wɔn kɔn dɔe,

¹⁹na wɔkasa hyɛɛ Onyankopɔn sɛ: So Onyankopɔn betumi atow ɔpon sare so?

²⁰Hwɛ, ɔbɔɔ ɔbotan ma nsu tuei, na asubɔnten senee; so abodoo nso, obetumi ama, na wapɛ nam ama ne man?

²¹ Enti AWURADE tee no, ne bo fuwii, na ogya sɔe Yakob mu, na abufuw nso sɔre hyɛɛ Israel,

²²efisɛ wɔannye Onyankopɔn anni, na wɔamfa wɔn ho anto ne nkwagye so.

²³Nanso ɔhyɛɛ wim tɔnn ɔsoro, na ohiɛɛ ɔsoro apon,

²⁴ na ɔtɔɔ mana guu wɔn so sɛ wonni, na ɔde soro aduan maa wɔn.

²⁵Atumfo aduan na onipa dii, ɔmaa wɔn aduan di mee.

²⁶Ɔmaa Apuei mframa bɔe ɔsoro, na ɔde ne tumi twee nifa mframa bae,

²⁷na ɔtɔɔ nam guu wɔn so sɛ mfutuma, ne ntakraboa sɛ mpoano anwea.

²⁸Na ɔma wɔtotɔɔ wɔn nsram de twaa wɔn tenabea ho hyiae.

²⁹Na wodi mee boroo so, efisɛ ɔmaa wɔn, wɔn akɔnnɔde.

³⁰Wonnya nnyaee wɔn akɔnnɔ no ɛ, wɔn aduan da so wɔ wɔn anom no,

³¹ Onyankopɔn abufuw sɔre hyɛɛ wɔn, na okunkum wɔn mu abran no mu bi, ɔde Israel mmerante hwehwee fam.

³²Eyi nyinaa mu na wɔkɔɔ so yɛɛ bɔne, na wɔannye n’anwonwade no anni.

³³ Enti ɔmaa wɔn nna yerae sɛ ahuro, ne wɔn mfe ehu mu.

³⁴Ɔrekum wɔn no, na wɔhwehwɛɛ no, na wɔsan bɛpɛɛ Onyankopɔn akyi kwan ntɛm,

³⁵na wɔkaee sɛ Onyankopɔn ne wɔn botan, na ɔsorosoro Nyankopɔn ne wɔn gyefo.

³⁶Wɔde wɔn ano dɛfɛdɛfɛɛ no, na wɔde wɔn tɛkrɛma dii atoro kyerɛɛ no,

³⁷na wɔn koma de, ɛmmata ne ho, na wɔanni n’apam mu nokware.

³⁸Na ɔno de, ɔyɛ timmɔbɔ nti, ɔkataa wɔn amumɔyɛ so, na wansɛe wɔn; na ɔtaa sianka n’abufuw, na wanhwanyan n’awerɛhow nyinaa.

³⁹ Na ɔkaee sɛ wɔyɛ ɔhonam, mframa a ɛkɔ na ɛnsan n’akyi bio.

⁴⁰ Mpɛn ahe ara na wɔantew n’anim atua sare so, na wɔanhow ne werɛ nkyerekyerewa so!

⁴¹Na wɔsan sɔɔ Onyankopɔn hwɛe, na woyii Israel kronkronni no ahii.

⁴²Wɔankae ne nsa, da a oyii wɔn fii ɔhohiafo nsam,

⁴³ na ɔyɛɛ ne nsɛnkyerɛnne Misraim ne n’anwonwade, Soan petee mu no.

⁴⁴ Ɔdan wɔn nsubɔnten mogya, na wɔantumi annom wɔn nsuwansuwa.

⁴⁵ Ɔsomaa atɛn beguu wɔn so ma wɔbɛwee wɔn, ne mponkyerɛn ma wɔbɛsɛee wɔn.

⁴⁶ Ɔde wɔn nnɔbae maa mmɛbɛw, na ɔde wɔn adwumade maa mmoadabi.

⁴⁷ Ɔde amparuwbo sɛee wɔn bobe, na ɔde asukɔtwea bɔɔ wɔn ankye nnua,

⁴⁸na oyii wɔn afieboa maa amparuwbo, ne wɔn mmoakuw maa asraman.

⁴⁹Ɔtow n’abufuw hyewhyew no guu wɔn so; anibere, ahi ne ahohia, abɔfo bɔne a ɔsomaa wɔn baa wɔn so no.

⁵⁰ Ɔbɔɔ ɔkwan maa n’abufuw, wankora wɔn kra amfi owu mu, na oyii wɔn nkwa maa owuyare.

⁵¹ Na okum Misraim mmakan nyinaa, wɔn ahoɔden asefi, Ham ntamadan mu.

⁵² Na ogyaa ne man sɛ nguan, na ɔkaa wɔn sɛ mmoakuw, sare so,

⁵³ na ogyaa wɔn dwoodwoo kɔe na wɔansuro, na wɔn atamfo de, ɛpo no kataa wɔn so.

⁵⁴ Na ɔde wɔn baa ne kronkronbea hye so, bepɔw a ne nsa nifa gyei no so.

⁵⁵Ɔpampam amanaman, wɔn anim, na ɔbɔɔ wɔn awunnyade so ntonto kyɛɛ no hama so, na ɔmaa Israel mmusuakuw tenatenaa wɔn ntamadan mu.

⁵⁶Nanso wɔsɔɔ ɔsorosoro Nyankopɔn hwɛe tew no ahi, na n’adansesɛm no, wɔanni so.

⁵⁷ Na wɔwae twaa nkontompo sɛ wɔn agyanom, wɔmanee sɛ ta daadaafo.

⁵⁸ Wɔde wɔn srɔnsrɔnmmea huruu ne bo, na wɔde wɔn ahoni ma ɔtwee ninkunu.

⁵⁹Onyankopɔn tee, na ne bo fuwii, na Israel ho yɛɛ no nwini koraa.

⁶⁰ Na ogyaw Silo tenabea no, ntamadan a osii nnipa mu no.

⁶¹Ɔde n’ahoɔden hyɛɛ nnommumfa mu, na ɔde n’anuonyam hyɛɛ ɔtamfo nsa.

⁶²Ogyaa ne man maa nkrante, na ne bo fuw n’agyapade.

⁶³Ogya hyew wɔn mmerante, na wɔn mmabaa nso, wɔanto wɔn ayeforo dwom.

⁶⁴ Wɔn asɔfo totɔɔ nkrante ano, na wɔn akunafo annya asuye.

⁶⁵Na AWURADE nyanee sɛ obi a ofi nna mu, sɛ ɔkatakyi a nsa ma ohuro,

⁶⁶na ɔbobɔɔ n’atamfo ma wɔsan wɔn akyi, ɔbɔɔ wɔn daa adapaa.

⁶⁷ Nso wampɛ Yosef ntamadan no, na Efraim abusuakuw no, wamfa;

⁶⁸ na mmom ɔfaa Yuda abusuakuw, Sion bepɔw a wadɔ no no.

⁶⁹Na osii ne kronkronbea sɛ ɔsoro, sɛ asase a ɔde atim hɔ daa no.

⁷⁰ Na oyii n’abofra Dawid, na ɔfaa no fii nguannan mu.

⁷¹ Ɔma ofii nguammere a wɔma nufu akyidi bae, sɛ ɔmmɛyɛn ne man Yakob ne n’agyapade Israel.

⁷²Na ɔyɛn wɔn koma mudi so, na ɔde ne nsam nimdeɛ kyerɛɛ wɔn kwan.