Read Revised Akuapem Twi DC-KYERƐW KRONKRON Nnwom 85 Bible Online

Nnwom 85 - Revised Akuapem Twi DC-KYERƐW KRONKRON bible

Nnwom 85

¹Wɔde ma dwonkyerɛfo. Kora mma dwom AWURADE, woadom w’asase, wode Yakob agyapade asan aba,

² wode wo man mfomso, akyɛ woakata wɔn bɔne nyinaa so. Sela

³Woatwe w’anibere nyinaa, woadan afi w’abufuw hyewhyew no mu.

⁴Yɛn nkwagye Nyankopɔn, san fa yɛn bra, na twa wo bo a ehuru yɛn no to wo yam.

⁵ So wo werɛ bɛhow ahyɛ yɛn akosi daa a? Wobɛtwe w’abufuw mu akɔ awo ntoatoaso a edidi so mu?

⁶So worensan mma yɛn nkwa, na wo man ani nnye wo ho?

⁷AWURADE, ma yenhu w’adɔe, na fa wo nkwagye ma yɛn.

⁸ Metie nea Onyankopɔn AWURADE bɛka. Ampa, ɔka asomdwoesɛm kyerɛ ne man ne n’ahotefo; na mma wɔnnsan nnkɔ nkwaseade mu.

⁹Ampa ara, ne nkwagye bɛn wɔn a wosuro no, na anuonyam atena yɛn asase so.

¹⁰Ɔdom ne nokware behyia, na trenee ne asomdwoe adi mfewano.

¹¹Nokware befifi asase so, na trenee afi soro ahwɛ.

¹²Nso AWURADE bɛma papa, na yɛn asase bɛma ne nnɔbae.

¹³Trenee bedi n’anim, na asi n’anammɔn kwan so.