Read Revised Akuapem Twi DC-KYERƐW KRONKRON Nnwom 88 Bible Online

Nnwom 88 - Revised Akuapem Twi DC-KYERƐW KRONKRON bible

Nnwom 88

¹Kora mma dwom a wɔde ma dwonkyerɛfo sɛ wɔnto no Mahalat sanku so, Leanot nne so. Esrani Heman nnwenho dwom Ao! AWURADE, me nkwagye Nyankopɔn, misu mefrɛ wo awia ne anadwo,

²ma me mpaebɔ nnu w’anim, brɛ w’aso ase ma me nteɛm.

³Na ɔhaw ayɛ me kra ma, na me nkwa rebɛn asaman.

⁴Wɔkan me fra wɔn a wɔkɔ amoa mu mu, mayɛ sɛ ɔbarima a onni ɔboa bi.

⁵Wɔatow me akyene awufo mu, sɛ atɔfo a wɔde wɔn agu ɔda mu a wonkae wɔn bio, na wɔatwa wɔn afi wo nsam.

⁶Wode me ato amoa donkudonku mu, esum mu, ebun ase tɔnn.

⁷ W’abufuhyew hyɛ me so, na woma w’asorɔkye nyinaa gu me so. Sela

⁸ Woayi m’amannifo afi me nkyɛn akɔ akyirikyiri, wode me ayɛ wɔn akyide, wɔato me mu a meremfi adi.

⁹Amane ama m’aniwa akisa, mefrɛ wo, AWURADE, daa adesae, metrɛw me nsam mekyerɛ wo.

¹⁰ So wobɛyɛ anwonwade akyerɛ awufo, anaasɛ nsamanfo bɛsɔre ayi wo ayɛ? Sela

¹¹So wɔbɛka w’adɔe ɔda mu anaa wo nokwaredi ɔsɛe amoa mu?

¹²So wobehu w’anwonwade, sum mu, ne wo trenee, awerɛfiri asase so?

¹³Na me de, wo, AWURADE, na misu mefrɛ, na me mpaebɔ tua wo ahema.

¹⁴AWURADE, adɛn na wotow me kra kyene, adɛn nti na wode w’anim hintaw me?

¹⁵Meyɛ mmɔboroni, na mereyɛ mawu fi me mmofraase, wo ho hu akura me, na metɔ ntintan.

¹⁶W’abufuw abu afa me so, w’ahide atware me;

¹⁷atwa me ho ahyia te sɛ nsu daa adesae, ɛbom twa me ho dantaban.

¹⁸ Woayi ɔdɔfo ne adamfo afi me nkyɛn akɔ akyirikyiri, na me manni akɔ sum mu.