Read Revised Akuapem Twi DC-KYERƐW KRONKRON Nnwom 95 Bible Online

Nnwom 95 - Revised Akuapem Twi DC-KYERƐW KRONKRON bible

Nnwom 95

¹Mommra mma yɛnto anigye dwom mma AWURADE, momma yɛmmɔ ose mma yɛn nkwagye botan.

²Momma yɛmfa aseda mmra n’anim, na yɛmfa nnwom nni ahurusi mma no.

³ Na AWURADE yɛ Onyankopɔn kɛse ne ɔhenkɛse, anyame nyinaa so.

⁴Ne nsam na asase mu ahintade wɔ, na mmepɔw so srɔnsrɔn nso wɔ no.

⁵Ɔno na ɛpo wɔ no, na ɔno na ɔyɛe, na asase kesee nso, ne nsa na ɛnwenee.

⁶Mommra mma yemmutuw nkotow nsɔre AWURADE, yɛn yɛfo anim.

⁷ Na ɔno ne yɛn Nyankopɔn, na yɛn de, yɛyɛ n’adidibea nkurɔfo ne ne nsam nguan. Ɛnnɛ mote ne nne no ɛ!

⁸Monnyɛ mo koma dennen sɛ Meriba, sɛ Masa da no, sare so hɔ,

⁹ bere a mo agyanom gyigyee m’ano, na wɔsɔɔ me hwɛe no, nanso wɔanya me nnwuma nhui.

¹⁰Mfe aduanan na awo ntoatoaso no ho yɛɛ me ahi, na mekae sɛ: Ɔman a wɔfom komam ne wɔn. Na wɔn de, wɔanhu m’akwan.

¹¹ Na ɛma mekaa m’abufuw mu ntam, sɛ wɔrennu me home mu.