Read Revised Akuapem Twi DC-KYERƐW KRONKRON Mmebusɛm 1 Bible Online

Mmebusɛm 1 - Revised Akuapem Twi DC-KYERƐW KRONKRON bible

Mmebusɛm 1

¹ Israel hene Solomon, Dawid ba no, mmebusɛm ni:

²Sɛ wɔmfa nhu nyansa ne nteɛso, sɛ wɔmfa nhu nhumu nsɛm mu;

³sɛ wɔmfa nnye nimdeɛ nteɛso, trenee, atemmu ne ade a ɛteɛ;

⁴sɛ wɔmfa nkyerɛ ntetekwaa anitew, aberante nso nimdeɛ ne adwempa.

⁵Na onyansafo ntie, na n’adenim nnɔɔso, na onimdefo mfa nnya atɛmpa:

⁶Sɛ wɔmfa nhu abebusɛm ne akasabebui, anyansafo nsɛm ne wɔn mmɛ mu.

⁷ AWURADE suro ne nimdeɛ mfiase; nkwaseafo bu nyansa ne nteɛso animtiaa.

⁸ Me ba, tie w’agya nteɛso, na mpo wo na mmara;

⁹ na ɛyɛ wo ti anuonyam abotiri ne wo kɔn mu ntweaban.

¹⁰Me ba, sɛ nnebɔneyɛfo gyigye wo a, mpene!

¹¹Sɛ wose: Bra ma yenkobuw mogya, ma yɛnkɔtɛw nea odi bem kwa;

¹²ma yɛmmemmene wɔn anikan sɛ asaman, ne pɛyɛfo sɛ wɔn a wosian kɔ amoa mu;

¹³yebenya ade a ne bo yɛ den nyinaa, yɛde asade bɛhyɛ yɛn afi ma.

¹⁴Fa wo kyɛfa bɛbɔ yɛn de mu, yɛn nyinaa benya kotoku biako.

¹⁵Me ba, wo ne wɔn nnnantew ɔkwan so. Twe wo nan fi wɔn sa so.

¹⁶Na wɔn nan tu mmirika kɔ bɔne mu, na wɔpɛ ntɛm hwie mogya gu.

¹⁷Na ɔkwa ara na wɔasum afiri ntakraboa nyinaa anim;

¹⁸na wɔn de, wɔn ankasa mogya na wobuw, wɔtɛw wɔn ankasa kra.

¹⁹Saa, na amim mu mfasopɛfo nyinaa akwan te, ɛfa ne wuranom kra kɔ.

²⁰Nyansa teɛm mmorɔn so, ɔma wɔte ne nne mmɔnten so;

²¹ ɔteɛm aguabirim ti, ɔka ne nsɛm, kurow apon ano, kurow no mu sɛ:

²²Da bɛn ara na mo ntetekwaa, mobɛpɛ ntetekwaasɛm akosi? Na afɛwdifo bɛpɛ wɔn fɛwdi, na nkwasea akyi nimdeɛ?

²³Monnan mo ho mma me kasakyerɛ. Hwɛ, mɛworo me honhom mama mo, mɛma moahu me nsɛm.

²⁴ Sɛ mafrɛ, na mokame, mateɛ me nsam, na obi mfa nyɛ hwee,

²⁵na motow m’afotu nyinaa kyene, na me kasakyerɛ no, mompɛ nti,

²⁶ me nso mɛserew mo, mo amane mu, mo ahopopo bɛba no, meyi mo ahi.

²⁷Mo ahopopo ba sɛ ɔprannaa, na mo amane ba sɛ ahum, ahohia ne ahokyere ba mo so a,

²⁸ ɛno na wɔbɛfrɛ me, na merennye so, wɔbɛhwehwɛ me ahema, na wɔrenhu me.

²⁹Esiane sɛ wokyi nimdeɛ, na wɔampɛ AWURADE suro,

³⁰wɔampɛ m’afotu, na wɔpoo me kasakyerɛ nyinaa,

³¹ enti wobedi wɔn kwan so aba, na wɔn agyina a wotutui amee wɔn.

³² Na ntetekwaa akyirisan bekum wɔn, na nkwasea yiyedi bɛsɛe wɔn.

³³ Na nea otie me no de ɔbɛtena hɔ komm, na ne ho adwo no a onsuro sɛ amane reba.