Read Revised Akuapem Twi DC-KYERƐW KRONKRON Mmebusɛm 10 Bible Online

Mmebusɛm 10 - Revised Akuapem Twi DC-KYERƐW KRONKRON bible

Mmebusɛm 10

¹ Solomon mmebusɛm. Ɔba nyansafo ma n’agya ani gye, na ɔba kwasea yɛ ne na awerɛhow.

²Ɔbɔnefo akorade nyɛ mfaso bi, na trenee gye onipa fi owu mu.

³ AWURADE mmma ɔkɔm nne ɔtreneeni kra, na abɔnefo adepɛ de, ɔka gu.

⁴ Ohia behia nea ɔtwentwɛn ne nsa ase, na nsiyɛfo nsa ma wonya wɔn ho.

⁵Nea ɔboaboa ano ahohuru bere no yɛ ɔba nyansafo, na nea ɔtɔ nko twabere no yɛ ɔba a ɔhyɛ aniwu.

⁶Nhyira da ɔtreneeni atifi, na akakabensɛm kata abɔnefo ano.

⁷ Ɔtreneeni nkae yɛ nhyira, na abɔnefo din bɛporɔw.

⁸Komam nyansafo gye mmara nsɛm, na ogyimifo kurokurofo bɛhwe ase.

⁹Nea ɔnam pɛyɛ mu no nam dwoodwoo, na nea ɔkyea n’akwan no, wobehu no.

¹⁰ Nea obu ani no yi awerɛhow, na ogyimifo kurokurofo bɛhwe ase.

¹¹ Ɔtreneeni ano yɛ nkwa nsuti, na akakabensɛm kata abɔnefo ano.

¹² Ɔtan hwanyan atutuw, na ɔdɔ kata mfomso nyinaa so.

¹³Nhumufo anom na wohu nyansa, na abaa fata nea onni ti akyi.

¹⁴Anyansafo kora nimdeɛ, na ogyimifo ano yɛ abu a ɛbɛn.

¹⁵ Ɔdefo ahonyade ne ne kurow a ɛyɛ den, abrɛfo abu a ebu wɔn ne wɔn hia.

¹⁶ Ɔtreneeni adeyɛ ma nkwa, ɔbɔnefo nnɔbae de, ɔde yɛ bɔne.

¹⁷Nea obu nteɛso no fa nkwa kwan so, na nea ɔpo animka no fom kwan.

¹⁸Nea ɔkata nitan so no wɔ atoro ano, na nea otwiri obi no yɛ ɔkwasea.

¹⁹Mfomso mpa ɔkasa dodow mu, na nea osianka n’ano yɛ onimdefo.

²⁰Ɔtreneeni tɛkrɛma yɛ dwetɛ a wɔayiyi mu, abɔnefo koma de, ɛmfra.

²¹Ɔtreneeni ano yɛn nnipa pii, na agyimifo de, ti a wonni nti wowuwu.

²² AWURADE nhyira na ɛyɛ ɔdefo, na ɔbrɛ adwuma mfa bi nka ho.

²³Amumɔyɛ yɛ ɔkwasea sɛ agoru, na nyansa yɛ nhumu nipa fɛ.

²⁴ Ɔbɔnefo ade a osuro ara na ɛbɛba no so, na treneefo ade a wɔpɛ no, wɔbɛma wɔn.

²⁵Sɛ ahum tu twam a, na ɔbɔnefo nni hɔ bio, na ɔtreneeni yɛ daa nnyinaso.

²⁶Sɛ nsa nyinyanyinya yɛ ɛse na owusiw yɛ aniwa no, sɛ onihawfo yɛ wɔn a wɔsoma no ne no.

²⁷ AWURADE suro to nna so, na abɔnefo mfe de, wobetwa so.

²⁸ Treneefo anidaso bɛyɛ anigye, na nea abɔnefo hwɛ no kwan no bɛyera.

²⁹ AWURADE akwan yɛ ahoɔden ma pɛyɛfo, na ɛyɛ ɔsɛe ma amumɔyɛfo.

³⁰ Ɔtreneeni renhim da biara da, na abɔnefo rentena asase so.

³¹ Ɔtreneeni ano yi nyansa adi, na tɛkrɛma kɔntɔnkye de, wobetwa.

³²Ɔtreneeni ano nim ade a ɛsɔ ani, na abɔnefo ano di akɔntɔnkyesɛm.