Read Revised Akuapem Twi DC-KYERƐW KRONKRON Mmebusɛm 18 Bible Online

Mmebusɛm 18 - Revised Akuapem Twi DC-KYERƐW KRONKRON bible

Mmebusɛm 18

¹Nea watew ne ho no hwehwɛ anoyi daa, na ade pa biara ho yɛ no ahi.

²Ɔkwasea nni nhumu ho anika, na mmom sɛ obeyi ne koma adi.

³Ɔbɔnefo ba a, animtiaabu nso ba, na adapaa ne ahohora na ɛnam.

⁴Ɔbarima anom nsɛm te se nsu a emu dɔ, nyansa abura te sɛ asuten a ɛba yiye.

⁵ Enye sɛ wɔhwɛ ɔbɔnefo anim, na wɔdan ɔtreneeni asɛm ani, atemmu mu.

⁶Ɔkwasea ano ma ntɔkwaw ba, na n’afono frɛfrɛ asotɔre.

⁷ Ɔkwasea ano ne ne sɛe, na n’anofafa ne ne kra afiri.

⁸ Osututufo nsɛm te sɛ mfremfremade, na esian kɔ ɔyafunu mpia mu.

⁹ Nea ɔtoto n’adwuma ase nso, ɔdesɛefo nua ne no.

¹⁰ Abannennen ne AWURADE din, ɛno mu na ɔtreneeni guan kɔ, na wɔkora no.

¹¹ Ɔdefo ahonyade ne ne kurow a ɛyɛ den, na ɛte sɛ ɔfasu a ɛkorɔn n’adwene mu.

¹² Nea edi ɔsɛe anim ne sɛ ɔbarima koma ma ne ho so, na nea edi anuonyam anim ne ahobrɛase.

¹³Nea obua asɛm ansa na ɔte no, ɛyɛ agyimisɛm ne aniwu ma no.

¹⁴ Onipa honhom tumi soa ne yare, na honhom a abotow de, hena na obetumi asoa?

¹⁵Nhumufo koma nya nimdeɛ, na anyansafo aso hwehwɛ nimdeɛ akyi kwan.

¹⁶ Onipa ayɛyɛde bɔ ɔkwan ma no, na ɛde no ba nnipa akɛse anim.

¹⁷Nea ɔbɔ ne nkuro kan yɛ sɛ ɔtreneeni kosi sɛ ne yɔnko ba bɛpɛɛ no mu.

¹⁸ Ntonto pata atutuw, na ɛpae atumfo ntam.

¹⁹Onua a wɔafom no sen kurow dennen, na atutuw te sɛ abankɛse akyi adaban.

²⁰ Ɔbarima anom aba ma ne yafunu mee, n’anom nnɔbae mee no.

²¹ Owu ne nkwa wɔ tɛkrɛma nsam, na nea ɔdɔ no no bedi n’aba.

²² Nea wanya ɔyere no anya adepa, na wanya AWURADE hɔ anisɔ.

²³Kyɛwpa na ohiani de kasa, na ɔdefo bua asɛnnennen.

²⁴Nea ɔfa nnamfo pii no de sɛe n’ankasa ne ho, nanso na adamfo bi wɔ hɔ a ɔfam ne ho sen onua.