Read Revised Akuapem Twi DC-KYERƐW KRONKRON Mmebusɛm 25 Bible Online

Mmebusɛm 25 - Revised Akuapem Twi DC-KYERƐW KRONKRON bible

Mmebusɛm 25

¹Eyi nso ne Solomon mmebusɛm bi a Yuda hene Hesekia nnipa fa kyerɛwee.

²Onyankopɔn anuonyam ne asɛm so hintaw, na ahene anuonyam ne asɛm mu hwehwɛ.

³Ɔsoro ware a ɛware, ne asase mu dɔ a ɛdɔ, ne ahene komam nni hwehwɛbea.

⁴Yi fi fi dwetɛ mu, na agude fi odwumfo nsam aba.

⁵ Yi ɔbɔnefo fi ɔhene anim, na n’ahengua betim trenee mu.

⁶Nhyehye wo ho ɔhene anim, na nkogyina nnipa akɛse gyinabea.

⁷ Na eye sɛ wɔka kyerɛ wo sɛ: Bra ɔsoro ha! Sen sɛ wɔbɛbrɛ wo ase ɔberɛmpɔn a w’aniwa ahu no no anim.

⁸Mfi hyerebahyereba nkɔko, na ebewie akyiri no a wo yɔnko agu w’anim ase no, wobɛyɛ dɛn?

⁹ Asɛm a wo ne wo yɔnko wɔ no, wo ne no nni, na nyi obi ahintasɛm adi.

¹⁰Na nea ɔbɛte no annidi wo atɛm, na wo nsopa anka hɔ.

¹¹ Asɛm a wɔka a ɛfata te sɛ sika aduaba wɔ dwetɛ kɛntɛn mu.

¹²Sɛ sika asomkaa ne amapa ahyehyɛde te no, sɛ onimkafo nyansafo te wɔ aso a ɛte asɛm so ne no.

¹³Sɛ sukyerɛma dwo te twabere mu no, saa na ɔbɔfo nokwafo te ma wɔn a wɔsomaa no, efisɛ odwudwo ne wuranom kra.

¹⁴ Nea ɔde ayɛyɛ hunu hoahoa ne ho no te sɛ amununkum ne mframa a osu nni mu.

¹⁵ Abodwokyɛre dan ɔtemmufo ti, na tɛkrɛmabere bu dompe mu.

¹⁶Wuhu ɛwo a, di nea ɛso wo, na anyi wo, na woamfe angu.

¹⁷Mma wo nan nnyɛ wo yɔnko fi ntiantia, na wo ho anyɛ no mfonee na wantan wo.

¹⁸ Asabaa ne nkrante ne agyan nnamnam ne onipa a odi ne yɔnko ho adansekurum.

¹⁹Ɔkɔnkɔnsani so anidaso hiada te sɛ ɛse a abu ne nan a afekyere.

²⁰Nea ɔto dwom kyerɛ ɔwerɛhowni no te sɛ nea ɔpa ntama awɔwbere mu, anaa nsa nyinyanyinya a wɔde gu gyakisi so.

²¹ Sɛ ɔkɔm de wo tamfo a, ma no aduan nni, na osukɔm de no a, ma no nsu nnom;

²²na wobɛsɔ nsramma agu n’atifi, na AWURADE bɛhyɛ wo ananmu.

²³Atifi fam mframa wo osu, na ntwiri tɛkrɛma wo abufunim.

²⁴ Ɔdan atifi kokoam tena ye sen sɛ wo ne ɔbea tutupɛfo a ne ho nwo bɛtena ɔdan mu.

²⁵Sɛ nsuonwini yɛ ɔkra a atɔ piti no, sɛ asɛmpa a efi akyirikyiri asase so yɛ ne no.

²⁶Ɔtreneeni a ɔtɔ ɔbɔnefo anim ntintan te sɛ nsuaniwa a wɔatiatia mu ne abura a wɔasɛe no.

²⁷Ɛwodi ntraso nye, enti anuonyam a nnipa pɛ ma wɔn ho nyɛ anuonyam.

²⁸ Onipa a ontumi nhyɛ ne ho so no te sɛ kurow a abubu a afasu nni ho.