Read Revised Akuapem Twi DC-KYERƐW KRONKRON Mmebusɛm 26 Bible Online

Mmebusɛm 26 - Revised Akuapem Twi DC-KYERƐW KRONKRON bible

Mmebusɛm 26

¹ Sɛ ahohurubere mu sukyerɛma ne twabere mu su te no, sɛ anuonyam mfata ɔkwasea ne no.

²Sɛ akasanoma kyin na asomfena tu no, saa ara na nnuabɔ hunu remma mu.

³ Pɔnkɔabaa fata ɔpɔnkɔ, nnareka fata afurum, na abaa nso fata ɔkwasea akyi.

⁴Mmua ɔkwasea n’agyimisɛm so, na wo nso woanyɛ sɛ ɔno.

⁵Bua ɔkwasea n’agyimisɛm so, na wanyɛ n’ani so onyansafo.

⁶Nea ɔde nsɛm soma ɔkwasea no twitwa n’ankasa nan, na ɔnom mmusu.

⁷Sɛ apakye nan sensɛn hɔ no, sɛ nkwasea anom abebusɛm te ne no.

⁸ Sɛ abohene boaa te abokuw so no, sɛ nea ɔhyɛ ɔkwasea anuonyam te ne no.

⁹Sɛ nsɔe poma te wɔ ɔsabofo nsam no, sɛ nkwasea anom abebusɛm te nen.

¹⁰Nea ɔbɔ ɔkwasea ne anantefo paa no te sɛ bɛmmatofo a opira nnipa nyinaa.

¹¹ Sɛ ɔkraman san kɔ ne fe ho no, sɛ ɔkwasea ti n’agyimisɛm mu ne no.

¹² Wuhu onipa a ɔyɛ n’ankasa ani so nyansafo a, anidaso wɔ hɔ ma ɔkwasea sen no.

¹³ Ɔkwadwofo se: Ɔsebɔ wɔ ɔkwan mu, gyata wɔ mmɔnten so!

¹⁴ Sɛ ɔpon dan ne ho ne mpontɛre so no, sɛ Ɔkwadwofo nso yɛ ne kɛtɛ so nen.

¹⁵ Ɔkwadwofo de ne nsa bɔ asanka mu, ɛhaw n’ani sɛ ɔde bɛhyɛ n’anom.

¹⁶Ɔkwadwofo yɛ n’ani so nyansafo sen nnipa baasɔn a wɔkyerɛ ade a ɛsɛ.

¹⁷Nea ɔde ne ho fra asɛm a ɛnyɛ ne de mu te sɛ nea oso ɔkraman a ɔretwam aso mu.

¹⁸Sɛ ɔbɔdamfo a ɔtow nnyansramma, agyan ne owu te no,

¹⁹sɛ onipa a ogyigye ne yɔnko, na ɔka se: Agoru na meredi, te ne no.

²⁰ Nnyina sa a, ogya dum, na sɛ huhuhuhu nni hɔ a, ntɔkwaw to twa.

²¹ Sɛ gyabiriw yɛ ma nsramma, ne nnyina ma ogya no, sɛ ɔbarima ntɔkwapɛfo ma ɔko ano sɔ ne no.

²² Nea ɔpɛ huhuhuhu nsɛm te sɛ mfremfrem ade, na esian kɔ nnipadua no mu pɛɛ.

²³Ano fremfrem ne amumɔyɛ koma te sɛ dwetɛ fi a wɔde adura asankagow ho.

²⁴Nea ɔtan obi no de n’ano kyerɛ asɛm bi, na ne mu de, osiesie nkontompo.

²⁵Sɛ ɔka adɔkɔdɔkɔsɛm a, nnye no nni, na akyide ason wɔ ne komam.

²⁶Nitan de nnaadaa kata ne ho, nanso asafo mu wobeyi ne bɔne adi.

²⁷ Nea otu amoa bɛhwe ɛno ara mu, na nea omunum ɔbo no, ɛbɛsan aba no so.

²⁸Atoro tɛkrɛma kyi wɔn atamfo, na ano a ɛdɛfɛdɛfɛ de ɔsɛe ba.