Read Revised Akuapem Twi DC-KYERƐW KRONKRON Mmebusɛm 27 Bible Online

Mmebusɛm 27 - Revised Akuapem Twi DC-KYERƐW KRONKRON bible

Mmebusɛm 27

¹ Mfa ɔkyena nhoahoa wo ho, na wunnim nea ɛda no de bɛba.

² Ma obi nyi wo ayɛ, na ɛnyɛ w’ano, ɔhɔho, na ɛnyɛ w’anofafa.

³Ɔbo yɛ duru na anwea yɛ pemee, na ogyimifo abohuru yɛ duru sen n’abien nyinaa.

⁴Anibere yɛ atirimmɔden, na abufuw boro so, na hena na obetumi agyina ninkuntwe ano?

⁵Animka pefee ye sen ɔdɔ a ahintaw.

⁶ Ɔdɔfo pira yɛ nokware, na ɔtamfo mfewano yɛ nsisi.

⁷Ɔkra a wamee tiatia ɛwokyɛm so, na ɔkra a ɔkɔm de no de, nea ɛyɛ nwene biara yɛ no dɛ.

⁸Sɛ anomaa a ofi ne berebuw mu kyin te no, saa ara na onipa a wayera afi ne fi te nen.

⁹Ngo ne aduhuam ma akomatɔyam, na onipa adamfo mu dɛ sen ne komam agyinatu.

¹⁰ Nnyaw w’adamfo ne w’agya adamfo, na w’amane da no, nhyɛn wo nua fi; wo fipamfo a ɔbɛn ye, sen onua a ɔwɔ akyiri.

¹¹Me ba, yɛ onyansafo, na ma me koma ntɔ me yam, na manya asɛm mabua nea ɔbɔ me ahohora.

¹² Onitefo hu bɔne a ɛbɛba, na ɔde ne ho hintaw, ntetekwaa fa mu, na wonya asotwe.

¹³ Nea ogyina ɔhɔho akyi no, fa ne ntama, na nea odi ɔbea sansani agyinam no, gye no awowa.

¹⁴Nea otua ahema de nne kɛse hyira ne yɔnko no, wobebu no nnuabɔ ama no.

¹⁵ Asusow bere mu nsu a ɛsosɔ daa ne ɔbea ntɔkwapɛfo sɛ:

¹⁶Nea ose ɔresianka no no te sɛ nea osianka mframa, anaa ne nifa kita ngo.

¹⁷Dade sew dade ano, na saa ara na onipa tew ne yɔnko ani.

¹⁸Nea ɔhwɛ borɔdɔma dua no di n’aba, na nea ɔsom ne wura no, wɔbɛhyɛ no anuonyam.

¹⁹Sɛ nsu ma onipa hu n’anim no, saa ara na onipa koma ma onipa foforo hu ne de.

²⁰ Asaman ne ɔsɛe amoa mmee da, na onipa aniwa nso mmee da.

²¹Kyɛmfɛre wɔ hɔ ma dwetɛ, na fononoo wɔ hɔ ma sika, na onipa de, sɛ n’ayeyi te na wɔde hu no.

²²Sɛ wode ɔwɔmma siw ogyimifo ɔwaduru mu fra awi mu mpo a, n’agyimisɛm remfi ne ho.

²³Ohu na hu sɛnea wo nguan ho te, na dwene wo mmoa akuwakuw no ho yiye.

²⁴ Ahode ntena hɔ daa, na abotiri nkodu awo ntoatoaso nyinaa so.

²⁵Sɛ sare wu a, momono fifi, na wɔboaboa mmepɔw so nhabamma ano.

²⁶Nguanten bɛma wo adurade, na mmirekyi yɛ asase ti ade.

²⁷Na mmirekyi nufusu bɛdɔɔso ama w’aduan, ne wo fifo aduan, na wo mmabaa bɛmee.