Read Revised Akuapem Twi DC-KYERƐW KRONKRON Mmebusɛm 28 Bible Online

Mmebusɛm 28 - Revised Akuapem Twi DC-KYERƐW KRONKRON bible

Mmebusɛm 28

¹Abɔnefo guan bere a obi ntaa wɔn, na treneefo de, wɔyɛ nnam sɛ gyataforo.

²Asase mmarato na ɛma ɛso ahemfo dɔɔso, na nnipa nhumufo ne nimdefo na ɛma ɔhene kyɛ.

³Ohiani a ɔhyɛ ohiani so te sɛ osu a ɛpra ade kɔ a ɛmma aduan mma.

⁴ Wɔn a wogyaw mmara no yi abɔnefo ayɛ, na wɔn a wodi mmara so no ne wɔn di aperepere.

⁵Nnipa bɔne nhu atemmu mu, na wɔn a wɔhwehwɛ AWURADE akyi kwan no hu ade nyinaa mu.

⁶ Ohiani a ɔnam ne pɛyɛ mu ye sen nea ɔkyea akwan abien mu na wanya ne ho.

⁷Nea obu mmara no yɛ ɔba nyansafo, na nea ɔne ahohwifo bɔ no hyɛ n’agya aniwu.

⁸ Nea ɔde mfɛntom ne apempensi dɔre n’ade no, ɔboaboa ano ma nea obehu abrɛfo mmɔbɔ.

⁹ Nea oyi n’aso fi mmara tie ho no, ne mpaebɔ mpo yɛ akyide.

¹⁰Nea ogyigye teefo kɔ bɔne kwan so no, ɔbɛhwe ɔno ara amoa mu, na pɛyɛfo de wobedi ade pa.

¹¹Onipa defo yɛ n’ani so nyansafo, na ɔbrɛfo nhumufo hwehwɛ no mu.

¹² Treneefo di ahurusi a, ɛyɛ fɛ pii, na abɔnefo sɔre a, nnipa hintaw.

¹³ Nea ɔkata ne mmarato so no, ɔrenkye ade, na nea ɔka na ogyae no, wobehu no mmɔbɔ.

¹⁴Nhyira ne onipa a ɔfɛre ade daa yi; na nea ɔhyɛ ne koma den bɛtɔ bɔne mu.

¹⁵Ɔbɔnefo a odi ɔman abrɛfo so te sɛ gyata a ɔbobom ne sisi a n’ani abere.

¹⁶Ɔhene a onni nhumu, na ne nhyɛso so, nea ɔtan amimdi ma ne nna kyɛ.

¹⁷ Onipa a odi obi mogya ho so no obeguan akɔtɔ amoa mu, mma wonnsianka no.

¹⁸Nea ɔnam pɛyɛ mu no benya nkwa, na nea ɔkyea akwan abien mu no bɛhwe ase biako mu.

¹⁹ Nea ɔdɔw n’asase no, aduan bɛmee no, na nea odi ade hunu akyi no, ohia bɛmee no.

²⁰ Onipa ɔnokwafo nhyira bɛdɔɔso, na nea ɔpɛ ntɛm anya ne ho renyɛ tɔtorɔtɔɔ.

²¹Animhwɛ nye, nanso aduan afono ma so mpo na onipa bedi asɛmmɔne.

²² Oniberefo pere ahonya ho, na onhu sɛ ohia bɛba no so.

²³Nea ɔka obi anim no akyiri no, obenya anuonyam asen nea ɔde ne tɛkrɛma dɛfɛdɛfɛ.

²⁴ Nea ɔfow n’agya ne ne na ade na ɔka sɛ: Ɛnyɛ mmarato! No yɛ ɔdesɛefo adamfo.

²⁵Nea n’akɔnnɔ so hwanyan atutuw, na nea ɔde ne ho to AWURADE so bɛdɔ srade.

²⁶ Nea ne ho da ne koma so no yɛ ɔkwasea, na nea ɔnam nyansa mu no benya aguanye.

²⁷ Nea ɔma ohiani no, ɛrenhia no, na nea oyi n’ani no benya nnuabɔ pii.

²⁸ Abɔnefo sɔre a, nnipa hintaw, na wɔyera a, na treneefo redɔɔso.