Read Revised Akuapem Twi DC-KYERƐW KRONKRON Mmebusɛm 29 Bible Online

Mmebusɛm 29 - Revised Akuapem Twi DC-KYERƐW KRONKRON bible

Mmebusɛm 29

¹ Animka nipa a osen ne kɔn, wobebu no mpofirim, na ano nni aduru.

² Treneefo redɔɔso a, ɔman ani gye, na ɔbɔnefo di so a, ɔman si apini.

³ Onipa a ɔdɔ nyansa ma n’agya ani gye, na nea ɔne nguamamfo bɔ bɛsɛe n’ade.

⁴ Ɔhene de atemmu ma ɔman gyina, na akyɛdepɛfo bɔ no.

⁵Onipa a ɔdɛfɛdɛfɛ ne yɔnko no, osum n’anammɔn afiri.

⁶Onipa bɔne mmarato mu wɔ afiri, na ɔtreneeni bɛto ahurusi dwom, na n’ani agye.

⁷Ɔtreneeni hu abrɛfo asɛm di, ɔbɔnefo nhu saa nimdeɛ yi.

⁸Fɛwdifo sɔ kurow mu gya, na anyansafo sianka abufuw.

⁹ Ɔba nyansafo ne ogyimifo di apere a, ɔyɛ hoo oo, ɔserew oo, ɔhome nni mu.

¹⁰Mogyapɛfo tan pɛyɛfo, na teefo hwehwɛ ne kra agye no.

¹¹ Ɔkwasea yi ne honhom nyinaa adi, na onyansafo dwudwo no ma ɛka akyiri.

¹²Ɔpanyin a otie atosɛm no, n’asomfo nyinaa yɛ abɔnefo.

¹³Ohiani ne ɔpoobɔni ade biako da nso wɔ ho, nea ɔtew wɔn baanu nyinaa ani ne AWURADE.

¹⁴ Ɔhene a obu nokwatɛn ma abrɛfo no, n’ahengua betim daa.

¹⁵ Abaa ne animka ma nyansa, na abofra a wɔato no sraha gu ne na anim ase.

¹⁶ Abɔnefo dɔɔso a, mmarato dɔɔso, nanso treneefo behu wɔn asehwe.

¹⁷ Teɛ wo ba so na wama woahome, na wama wo kra anika.

¹⁸Anisoadehu nni hɔ a, ɔman yɛ bisibasaa, nanso nea obu mmara no, nhyira ne no.

¹⁹Wɔmfa nsɛm nteɛ akoa so, efisɛ ɔte ase, nso ommu.

²⁰ Wuhu onipa a ɔpere ne nsɛm ho a, anidaso wɔ hɔ ma ɔkwasea sen no.

²¹Nea ɔkokɔ n’akoa fi ne mmofraase no, akyiri no ɔbɛyɛ sɛ ɔba.

²² Obufufafo hwanyan ntɔkwaw, na ɔbobɔnefo mmarato dɔɔso.

²³ Onipa ahantan bɛbrɛ no ase, na honhom mu hobrɛaseni nsa bɛka anuonyam.

²⁴ Nea ɔne owifo kyɛ ade no tan ne kra, ɔte duabɔ no, nso ɔnka.

²⁵Onipa ho suro sum afiri, na nea ɔde ne ho to AWURADE so no ho bɛyɛ sonn.

²⁶Nnipa pii hwehwɛ ɔman so difo anim anuonyam, nanso AWURADE na obiara atemmu fi no.

²⁷Treneefo akyide ne onipa busufo, na ɔbɔnefo akyide ne nea ne kwan yɛ tee.