Read Revised Akuapem Twi DC-KYERƐW KRONKRON Mmebusɛm 8 Bible Online

Mmebusɛm 8 - Revised Akuapem Twi DC-KYERƐW KRONKRON bible

Mmebusɛm 8

¹ Ɛno ɛnyɛ nyansa na ɛteɛm, na ntease ma ne nne so?

²Sorɔnsorɔn atifi, ɔkwan so, nkwanta so na ogyinae,

³na ɔteɛm aponkɛse ho, kurotia, abobow ano sɛ:

⁴Mo mmarima na meteɛm mefrɛ mo, na me nne gyigye ma nnipa mma.

⁵Mo, ntetekwaa, momma mo ani ntew, na mo, nkwasea, munnya nhumu koma.

⁶Muntie, na merebɛka nsɛm a emu da hɔ, na m’anom bue de nsɛm a ɛteɛ ba;

⁷na nokware fi m’anom, na m’ano akyide ne abɔnefosɛm;

⁸m’anom nsɛm nyinaa nam trenee mu, ade a akyim anaasɛ ɛkyea nni mu;

⁹ne nyinaa mu da hɔ ma nhumufo, na ɛteɛ ma wɔn a wɔahu nimdeɛ.

¹⁰ Momfa me nteɛso, na ɛnyɛ dwetɛ, na momfa nimdeɛ, na munnyaw sika a wɔayiyi mu.

¹¹Na nyansa ye sen mmota, na afɛfɛde nyinaa, wɔmfa nto ho.

¹²Me, nyansa, me ne anitew na ɛte, na adwempa ne nimdeɛ na mihu.

¹³ AWURADE suro ne bɔne tan. Ahokyerɛ ne ahantan ne ɔkwammɔne ne akɔntɔnkyesɛm ano na mikyi.

¹⁴Afotu ne nyansahu wɔ me, mene nhumu, mmaninyɛ wɔ me.

¹⁵ Me so na ahene nam di hene, na atitiriw hyɛ mmara trenee;

¹⁶me so na mpanyimfo nam di panyin, ne abirempɔn, ne asase so atemmufo nyinaa.

¹⁷Me de, medɔ wɔn a wɔdɔ me, na wɔn a wɔhwehwɛ me ntɛm hu me.

¹⁸ Ahonyade ne anuonyam wɔ me hɔ, ahode a ɛkyɛ ne trenee.

¹⁹M’aba ye sen sika ne amapa, na me nnɔbae sen dwetɛ a wɔayiyi mu.

²⁰Trenee tempɔn mu na menam, atemmu akwan so pɛ,

²¹sɛ merema m’adɔfo adi ade, na mahyɛ wɔn adekorabea amaama.

²² AWURADE bɔɔ me de fii n’adwuma ase, ne nnwuma a efi teteete no mu adikan,

²³ɔde me sii hɔ fii tete bemee, fii mfiase ansa na asase reba.

²⁴Abun nni hɔ no, na wɔawo me, nsuti a ɛba nsu pii nni hɔ no;

²⁵wonnya mfaa mmepɔw nsisii hɔ, na nkoko nnya mmae no, na wɔawo me;

²⁶onnya nyɛɛ asase ne wura, ne wiase mfutuma no.

²⁷ Osiesiee ɔsoro no, na mewɔ hɔ, bere a otwaa abun ani kɔntɔnkrɔn no;

²⁸ɔde amununkum sensɛn soro pintinn, na bun mu nsuaniwa paee dennen,

²⁹ otwaa ɛpo hye, na nsu antra, na ɔde asase nhyɛase too hɔ no,

³⁰na mewɔ ne nkyɛn sɛ ne dwumfo panyin na meyɛ n’adɔde daa daa; m’ani gye n’anim bere nyinaa mu,

³¹ m’ani gye ne wiase asase so, na m’ani ka nnipa mma mu.

³²Na afei, mma, muntie me, na nhyira ne wɔn a wodi m’akwan so.

³³Muntie nteɛso na munhu nyansa, na monntew atua.

³⁴Nhyira ne onipa a otie me na ɔwɛn m’apon ano daa daa, na ɔhwɛ m’abobow ano apongua so:

³⁵ Na nea ohu me no hu nkwa, na onya AWURADE hɔ anisɔ;

³⁶na nea ɔfom me no di ne kra aboro, wɔn a wɔtan me nyinaa dɔ owu.